Mipa tennis a world number one ni lai Carlos Alcaraz chuan a vawikhatna atan Wimbledon semi-final a khel dawn a. Zanin hian seeded number three Daniil Medvedev nen an inkhel dawn.
Spanish mi, tun tournament a seeded number one Alcaraz hian seeded number six Holger Rune chu 7-6 (7-3) 6-4 6-4 in quarter-final ah a hneh.
Alcaraz leh Rune te hi tunlai tennis a player beiseiawm ber zing ami ve ve an ni a. Kum 20 ve ve niin tunhnaiah hma an sawn chak dun.
Wimbledon grass a inkhelah hian Rune-a’n a khingpui lakah break point hmu hmasa zawk mahse Alcaraz a kheltha viau a. A tawp thlengin Danish star tan tihbuai a har.
Alcaraz hi grass court-ah tournament a khelh vawi li na chauh a ni a. A chak hnuah, “Ka tan chuan helai hmun a semi-final khelhphak ringawt pawh hi thil ropui a ni. Ka kheltha viau in ka hria a, grass ah hetiang taka ka khel thei hi thil lawmawm tak a ni.” tiin a sawi.
A hma a ding tur
Semi-final a a hmachhawn tur kum 27 mi Medvedev hi Alcaraz ang bawkin US Open champion a ni tawh a. A khingpui tur ang thovin a vawikhatna atan Wimbledon final luh a tum dawn.
Seeded ni lova che tha tak tak Chris Eubanks chu 6-4 1-6 4-6 7-6 (7-4) 6-1 in Medvedev hian a hneh a. Round of 16 aia thui Wimbledon a la thleng ngai lo Medvedev a che tha tluang.
Semi-final lehlamah hian seeded number two Novak Djokovic leh Italian mi, player beiseiawm seeded number 8 Jannik Sinner te an inkhel ang.