Kan thenawm state Manipur buai chuan thla thum a awh tep tawh a. 3rd May 2023 atanga he buaina avanga nunna chan pawh sawrkar lam puan dan chuan 160 an chuang tawh niin a lang. Sawrkarin a record lem loh nunna chan hi engzat tak ni ang maw. An thih leh dam hriat loha bo an tam em em a, meitei lama an firfiak pawl leh meitei police lam thi te phei hi chu an sawrkar hian a puang tha duh vak lo niin an sawi nghe nghe a ni.
Buaina avanga khaw inhal sak a in runna a nasa hle. A bik takin Imphal hnaiha cheng zohnahthlakte khua hal an tam em em a. Heng khuaa mite hi hmun hrang hranga refugee camp ah dah an ni a. Refugee camp a awm ringawt pawh hi a sing tel an ni. Mizoram lamah pawh himna beiseia rawn tlan lut hi mi singhmih dawn an ni tawh a. Kan ram lam a la him avanga rawn tlan lut ten mizoram an lo luha an thlamuanzia an sawi thin hi a va vanneihthlak em. Kum 2021 atang khan kan unaute manganga awm Myanmar atangin mi sing tel an lo lut tawh bawk a. Zofate mangang tlankhawmna tur mizoram kan lo nei hi Pathian ruat ngei ani ang. Thlamuanna ram min din saktu Pathian hnena lawmthu sawi reng pawh hi ka bat a ni tih kan hriat nawn fo a ngai.
Amaherawh chu he mizoram hi belh tlak kan ni reng em tih ngaihtuah chian hian rilru a ipik a. Ei leh bara intodelh lo em em, Central fund a lo luh avanga la khawsa tawk tawk chauh mai kan ni a. Thawhchhuah nei lo ram, refugee pawh chawm tawk tawk, rawn tam belh leh hlek sela mangang mai tur kan ni.
Kan ram hian zofate inpui kan ni tiin kan tlangau a. Nuam kan tih viau lai hian kan rama mangang rawn tlanchhia pawh an pun belh kan hlau ani tawh a. Kan unaute mangang authawm chuan anmahni nghaisa mektu meiteite laka inhumhimna tur ralthuam leh silaimu an mamawh thu ring takin an sawi a. Nitin meiteite chuan sawrkar ralthuam tha nen anmahni umchhuah tumin beihpui an thlak mek a ni a. Pi leh pu atanga an lo chenna chhuhsak tumtu meiteite lak atanga inhumhimna mamawh ngawih ngawihte pawh puihna kan nei lova. Mimal leh tlawmngai pawl thahnemngai ten han khawn sak bawk thin mahse kan ram a retheih miau avangin sum khawn a sak em em mai si. Puih an ngai, puitu an neihchhun kan ram mipui hian inngaihtuah chian kan va ngai em.
Inpui belh tlak loh tak mizoram mipuite hian hmabak tih tur kan va ngah em. Kan ram hi ei leh bara kan dinhmun kan siamthat thuai thuai hi a mamawh takzet a. Belh tlak, inpui chan hi chang thei tur chuan nasa taka hna kan thawh a ngai tihte hi mipui hian i hre thar leh ang u. Midang pui thei lotu chuan inpui chan a chang pha lo. Unaute mangang pui tur hian kan rilru huaisenna ringawt a tawk lova, sum leh paia hma kan lak thar hi a ngai takzet a ni.