India chhim lama dan phal loh chunga ar insualtirna huaihawt thinah, ar siaka chem hriam an cheh beh chuan ar neitupa a tihlum.
Arpa neitu hi a neitupain a pawm laiin tal chhuah a tuma a tal chuan a kapah a tai fuh a. Rang taka damdawi in panpui ni mah se a thisen chhuak nasa lutuk avangin kalkawngah a thi.
Police-te chuan Telangana-a Lothunnur khuaa kar hmasa tir lama ar insualtirnaa tel mi dang 15-te chu an zawng zui nghal mek.
A taitu arpa pawh hi police station-ah lak a ni a, a hnuah farm-ah dah zui a ni.
Police-te chuan ar hi insual turin a inring tawh a, a insual ve hun nghak mek a ni a, a tal ta phut niin an sawi.
A tal chhuak chu a neitupa hian umzuiin a siaka cm 7-a sei chem a dah chuan a lo tai ta a ni.
Ar insualtirnaa telte hi rawng taka thil tia puh an ni a, dan phal lohva ar insual huaihawttute pawh thubuaisiamsak an ni tih AFP news agency chuan a tar lang.
The New Indian Express-in a tar lan dan chuan tual chhung police officer B Jeevan-a’n arpa hi nakinah, court-ah thil thleng finfiahna atan hruai a la ni dawn tih a sawi.
India ramah hian ar insualtir hi kum 1960 daih tawhah khan dan phal lohva tih a ni a; mahse, thingtlang lamah chuan an uar hle a. A bikin Telangana velah hian an ching a, Hindu kût pakhat, Sankranti hun lai vel phei chuan an uar hle.
Tun tum hi ar insualtirnaa arin a neitu a tihhlum vawi khatna a ni lo va. Nikum pawh khan Andhra Pradesh-ah pawh a siaka blade-in a nghawngah taiin a lo thi tawh bawk.
CNN chuan arpa hi a neituin insual tura a pawm chhuahna lamah a tai niin a tar lang.