Aizawl : Larsap Dr Hari Babu Kambhampati-a’n Hindi zirtirna kawnga a thawhhlawk avanga Padma Shri dawngtu C. Kamlova chu Raj Bhavan-ah a kawm a. Mizoramah Hindi zirtirna chak zawka kalpui theih dan tur te a sawipui.
Larsap chuan C. Kamlova thawhhrima leh Hindi zirtirna kawnga hma a lo kak tawhna te fakin, Mizorama thalai ten Sap- tawngah harsatna an neih loh laiin Hindi tawngah erawh hmasawnna tur an nei nia a hriat thu a sawi.
“Mizo thalaite hian theihna sang tak an nei a, an thiamna te behchhan hian India ram kh- awi hmunah pawh eizawnna tha tak tak an hmu thei niin ka hmu” Lar- sap chuan a ti a. Hindi tawng erawh an thiam tel tha a tih thu a sawi.
Larsap chuan Mizo thalai te zingah Hindi tawng thiam chak tam tak an awm nia sawiin, vanneihthlak a tih thu a sawi a. State then- khatah Hindi tawng zir duh lo leh dodal an awm laiin Mizo thalaite chuan Hindi thiam pawi an ti lovin a tangkaina an hria niin a sawi bawk.
C. Kamlova pawhin Larsapin Hindi zirtirna uar tura hmalak a duh chu thil phurawm tak nia a hriat thu a sawi a. “Tunah hian sikulah te Hindi zirtirna tha taka kalpui a nih rualin mipui nawlpuiin Hindi an zirna tur chuan hmalakna thar a ngai a ni” tiin, hemi chung- changah hian ruahmanna siam a nih tawh thu sawiin, Mizoram sorkar pawhin a pawm tawh thu a sawi a. Ruahmanna chu Art & Culture department-in NEC-a a thawn thlak tawh thu a sawi bawk a ni.