Aizawl : Sericulture Minister Er. Lalrinawma hovin nimin khan National Handloom Day chu NIC Video conference room-ah hman a ni a. Sorkar laipuia Ministry of Textiles-in ruahmanna a siam anga he ni hi ram pumah hman niin, Aizawlah chuan Weavers Service Centre, Ministry of Textiles-in inkhawm hi a buatsaih a ni.
Sericulture Minister chuan August ni 7, 1905 a ‘Swadeshi Movement’ kalpui tan hriatreng nan National Handloom Day chu hman thin a nih thu a sawi a. Mahni kutchhuak ngei hmanga ram pawn lama innghat lova intodelh tumna rilru chu hnam humhimna pawimawh tak a nih thu a sawi.
Handloom tihhmawsawn chu pawimawh a tih thu sawiin, Sericulture Minister chuan culture humhimna a nih tel thu leh mi tam tak tan eizawnna tha a nih thu a sawi a. “Mizoramah leh hmarchhak state dangah te heng kan handloom kutchhuak hi demand a tha a, a lo san belh zel nan pawh hmalak zel a tul a ni” a ti bawk.