Aizawl: Mizoram Larsap Dr Hari Babu Kambhampati chuan a Twitter enkawl kaltlangin, prime minister leh a kaihruai sorkar laipui hnenah rail way line thar kalna tur zawnchhuah pawm a nih avangin lawmthu a sawi.
Larsap chuan Mizoram hmasawnna atana thutlukna pawimawh tak siam a nih leh avangin Mizoram mipui aiawhin lawm thu a sawi tih a tarlang.
He survey-in a tar lan dan chuan, Sairang leh Myanmar ramri dep, Mizoram chhim lam hmawr tawpa Hmawngbuchhuah chu rel kawngin a thlun zawm dawn a ni.
Sairang atanga Hmawngbuchhuah thlenga line thar siamna tur Final Location Survey sanctioned Act East Policy-ah hmasawnna lian tak a pe dawn a. Act East Policy kalpui mek angin Indian Railways chuan Mizoram chhunga Myanmar ramri chu rel hmanga thlunzawm tumin, tun hnai khan Railway Board chuan Myanmar ramri bul, Mizoram chhunga km 223, Sairang (Aizawl) atanga Hmawngbuchhuah thlenga Final Location Survey (FLS) neih tak chu a pawm a ni.
He project hian Hmawngbuchhuah kaltlangin India hmarchhak lam kalpawhna kawngpui pawimawh tak a hawng dawn a. Myanmar-a Sittwe Port kaltlanga hmarchhak thlenga bungraw phurh man leh bungraw phurh hun chhung chu nasa takin a titawi dawna rin a ni a. Tun hnai khan Myanmar-a Sittwe Port hi Union Ports, Shipping & Waterways Minister Sarbananda Sonowal chuan a hawng tawh a ni.
Tunah hian N. F. Railway chuan Bairabi leh Sairang inkarah km 51.38-a thui broad-gauge railway line project a kalpui mek a, hei hi hna zawh fel thuai tum a ni. Myanmar Border-a km 111-a sei Imphal atanga Moreh inkar rel kawng connectivity project dang, final location survey pawh zawh thuai beisei a ni bawk.
Broad-gauge line thar ruahman hian India leh Myanmar leh Asia khawmualpuia ram dangte nena insumdawnna a siam dawn bakah inzawmna a tinghet dawn a. Hmarchhak state-te sum lama hmasawnna tihpunna kawngah pawh nasa takin awmzia a nei tura beisei a ni.