Tun hnaia ruah sur nasa vangin Mizoram hmun hrang hranga luite a lian a, tui lian vangin mi tam takin an chenna in an chhuahsan.
Ruah sur nasa avang hian Khawthlangtuipui chu a chim chin a sang hle a, a chhehvela khawsa, Tlabung khaw chhunga chhungkaw 30-te chu tui lian chim phak loh hmun him lamah sawn luh an ni a. Tlabung khaw pawn, Nunsury khuaa chhungkaw pali leh Tippereghat-a chhungkaw paruk chu hmun him lama an inthiar chhuah tawh bakah, tuiin a chim hlauhthawnawm zual chhungkaw dang pawh a tul thuta an insaseng theih nan, an insawn luhna tur ruahman fel a ni tawh bawk.
Tun tum hi kumin bikah Khawthlangtuipui chim sân lai ber niin, kum 2017 leh 2018-a a len laia a chim chin erawh tui hian a la thleng lo hle thung a, hetih lai hian Khawthlangtuipui hnar lamah ruah a han meuh loh avang leh la sûr chhunzawm zel tura ngaih a nih avangin tui chîm chin hi a sân belh zel rih an rin thu Tlabung Branch YMA hruaitute chuan an sawi.
Tlabung SDO (C) H Zonunmawia kaihhruaina hnuaiah mawhphurhna hrang hrang chelh tura ruat – Tlabung VC, Khawthlangtuipui Group YMA leh Young Pahari Association aiawhten tui lian tuarte chhawmdawl hna kalpui a ni a, bialtu MLA Nihar Kanti Chakma chuan tui lian tuarte chhawmdawl hna kalpui a nih dan a tul anga enpuia a fan kual bakah, hmun him lama insuan lutte hnena sem turin buhfai bag 10 a ruahmansak nghal.
Hetih lai hian Tlabunga truck neitu intelkhawmte chuan tui lian tuar inthiarchhuah ngaite bungraw phurh nan a thlawnin an lirthei an thawh tih an puang bawk.
Chawngte-ah pawh Tuichawng lui lianin veng thenkhatah chenna in luah theih lohvin a chim tawh a, chhungkaw 45 vel thiar chhuah an ni tawh.
The Chawngte Times Editor Omeg Lalramkinlova hnen atanga thudawn danin Tuichawng lui lian avangin Chawngte khawpui chu tuiin a chim nasa hle a, Kamalanagar IV-ah tui lian avangin in luah theih lova chim awmin Kamalanagar I New Angel School thlang lamah pawh tui lian hian in a chim bawk a, mi tlawngngaiten an bungrua an thiar chhuahpui a ni.
SDO (Civil) Lalneihthanga Colney chu a hmunah kalin chhanchhuah hna thawh dante a ruahmanpui a, chhungkua 45 chu hmun him lamah sawn an ni tawh a, school leh in ruak remchangah te suan luh niin, chhungkaw dang hmun him lama sawn tur pawh an la awm belh rin a ni.
Tuichawng lui hnar lam Parva pawhin tui lian hi an tuar ve a; mahse, insawn chhuah ngai engzat nge awm tih chiang takin hriat theih a ni rih lo.
Chawngte bakah hian Borapansury leh Chakma khaw eng emaw zatin tui lian hi an tuar nia thudawn a ni bawk.