European champion in hmeichhe football a ram lian zawka ngaih dangte an zui teuh a. England in Nigeria laka hnehna chang turin penalty shootout an mamawh.

Brisbane Stadium a round of 16 inkhelah England tan Georgia Stanway chuan penalty hmasa ber khung lo mahse Nigeria in vawi hnih an khung lo ve zui a. Chloe Kelly hmangin 4-2 in an chak.

Inkhel pangngaiah goal a lut lova, Nigeria inkhel a fakawm. England an talbuai thui hman teuh a, tun tournament a an forward pawimawh Lauren James chu Michelle Alozie a rah luih avangin minute 87-naah hnawhchhuah a ni.

England hian quarter-final ah Colombia emaw Jamaica an hmachhawn leh ang.

Beisei la pha lo

FIFA Women’s World Cup 2023-ah team lian zawka ngaihte an fuh thei lo. USA, Brazil leh Germany te an tla vek tawh a, beisei an pha lo vek. Hetihlai hian international football inelna sanga tawnhriat la nei tam lo zawka ngaihte an che tha.

Nigeria pawh heng zingah hian telin England lakah ‘gameplan’ an nei a, an duhthusam a tha in an tihlawhtling.

English attack hneh takin an veng a, anmahni zawkin an tlanchakna hmangin England tlarhnung an chhaihbuai fova. Ball inchuhah thlengin England in an ngam lo.

England manager Sarina Wiegman chuan, “Inkhel boruak sang a ni a, team tha an ni tih kan hrechiang. Kum 10 velin min ti upa zualin ka hria, tiang khawp chuan inkhel boruak kha a tang.” tiin a sawi zui.

A thlengtu la kal zel

Inkhel dangah a thlengtu ram pahnih zinga la dam Australia in quarter-final an lut a, Denmark 2-0 in an hneh.

Matildas tan chuan minute 29-naah Caitlin Foord chuan goal hmasa zawk a khung a, minute 70-naah Hayley Raso chuan an goal hnihna a khung.

Australia hian tun World Cup-ah a vawikhatna atan star player Sam Kerr an chhawr thei tawh a, huntawp lamah luh tir a ni.

Danes lakah hian Australia an khel tha a, captain Kerr hian a chhanchhuah khel mamawh lo mahse quarter-final a an tum tur France emaw Morocco lakah erawh an hmahruaitu Kerr hi a fit that tawh an mamawh ang.