Indonesia-a tlang kang nasa thei ber, mihring chen tam berna thliarkar, Java-a mi chu a kang thar leh a. Mei khu, gas leh chirh (lava) tam tak a tlang pangah a phuh chhuak.
Mount Merapi hian Pathianni khan vawi sarih vel meivap sa tak a phuh chhuak a. Hemi rual hian lung, thil keh them, lava leh gas tam tak a tel niin Yogyakarta khawpuia Volcanology & Geological Hazard Mitigation Center hotupa, Hanik Humaida chuan a sawi.
Tlang kang thawm hi hmun hla tak atang pawhi hriat phah a ni a. Mihring thi leh hliam erawh an awm hriat a la ni rih lo.
He tlang hi tun hnaiah kang thei maiin a awm reng a, Pathiannia a inphuh chhuah hma pawh hian a tlang chhimthlang lamah chuan lung leh meivap chu a chhuak fo tawh niin Humaida chuan a sawi.
Tlang kang khu chuan a bul hnai khua a bawh nasa hle niin a sawi bawk.
Merapi tlang pang leh a bulthuta chengte chu a kan chhuahna atanga km 5 aia hnaia awm lo turin leh lava inphuh chhuak chu a hlauhawm tih Indonesia-a Geology & Volcanology Research Agency chuan a sawi.
Mount Merapi hi Indonesia-a tlang kang 120 chuang zinga mi niin tun hnaiah pawh lava leh gas a phuh chhuak fo thin a. Kum 2010-a lianthama a kan hnuhnung ber khan mi 350 chuang an thi.