French champion Paris Saint-Germain chuan Portugal striker Goncalo Ramos chu Benfica atangin season tluan atan loan in an hawh.
Kum 22 mi hian nikum a Qatar World Cup-ah khan Portugal tan hattrick siamin khawvel hriat a hlawh phah hle. Club football-ah che tha bawkin Europe club lian hovin an ngaihven hlawh tak player a ni.
Tun season liamta khan Benfica tan match 47 khelin goal 27 a khung.
Ramos hi Paris Saint-Germain hian tun nipui a player langsar an lakluh pakuana a ni a. Paris khawpui a club hian star player rual la khawm lova team tha pangngai tak din an tum mek.
Team thar din an tumna kawngah goalkeeper Arnau Tenas, defender pahnih Milan Skriniar leh Lucas Hernandez, midfielder Marco Asensio, Manuel Ugarte, Lee Kang-in leh Xavi Simons te bakah forward Hugo Ekitike a nghetin an lalut bawk.
PSG hian Ramos hi season tawpah Euro maktaduai 80 velin a nghetin an lei thei dawn niin an sawi tel a. Kum 2017 a AS Monaco atanga Kylian Mbappe an lakluh dan ang deuhin inremna an nei.
Benfica chherchhuah Ramos hian striker bakah attacking midfielder ang pawhin a khel thei a. Benfica first team tan vawi 106 inkhel tawhin goal 41 a khung a, midang goal khung tur vawi 16 a siamsak bawk.
“Paris Saint-Germain zawm hi ka tan thil lian leh hlimawm tak a ni. Khawvela club lian zing ami, squad nei tha ber zing ami an ni.” tiin Ramos chuan a sawi.
PSG-ah hian forward Neymar chuan tunhnaiah president Nasser Al-Khelaifi chhuah a duh thu a hriattir a, Mbappe-a’n Real Madrid zawm a duh avangin training-ah telh a ni lo mek.