Aizawl : Vawiin hi Manipur tualchhung buaina avanga Zofate leh Meitei indona ni za (100)-na chiah a ni. Hemi pual hian Mizo Zirlai Pawl (MZP) in ‘Hnam tana nunna chante sunna leh inpumkhatna inkhawm’ a buatsaih dawn.
‘Hnam tana nunna chante sunna leh inpumkhatna inkhawm’ ah hian MZP chuan hmun hrang hranga awm Zofate tel turin an sawm a, a hmuna kal thei lo tan mahni awmhmuna lo chhimsak vek turin an ngen a. He hunah hian Zo hnahthlak Manipur tualchhung buai avanga harsatna tawk mekte tan tawngtai rualna neih a ni dawn a. Zoram mipui zawng zawngte MZP chuan Zo hnahthlak unaute tan nasa lehzuala Pathian au a, tawngtai turin a sawm nghal bawk.
‘Hnam tana nunna chante sunna leh inpumkhatna inkhawm’ hi zanin dar 8 hian Vana pa hall-ah neih tura ruahman a ni.