Aizawl: MPCC President Lalsawta chuan hmasawn turin hma thar lak a ngai a, a tha lo paih a, a tha zawk hmanga hmalak a ngai tih a sawi.
Nilaini khan Mizoram Taxi Association hruaitute leh MPCC President Lalsawta te chu Mizoram Taxi Association (MTA) Office Dawrpuiah an inkawm a. He hunah hian MTA hotuten taxi hmanga an eizawnna kawnga an ruahman leh an harsatna hrang hrangte an lo thlen.
Lalsawta chuan taxi hmanga eizawnna hi eizawnna satliah a ni mai a nih loh thu leh ram rawngbawlna a nih thu sawiin, “Mizoram rawn tlawhtu khualzin lo dawngsawngtu pawimawh, Mizoram nihphung pho langtu in ni a. Hemi kawngah hian sorkar hi mipui phurrit chhawk zangkhaitu tur a nih angin in harsatna leh ruahmannate hi chin fel harsa a ni lo,” a ti.
MPCC president chuan taxi hmanga eizawngtute harsatna tawh chu chin fel harsa lo tak vek niin, a ti thei dinhmuna an dina sorkarna an siam phawt chuan an sutkiansak tur thu leh, hei hi Congress Manifesto No. 3-ah pawh dah a nih thu a sawi.
“Taxi hmanga eizawngtute leh taxi chhawr tangkaitu mipuite nena rualkhai zawka kal dun theih chu ram tan a tul a. Taxi hmanga eizawnna tihhmasawn leh tihchangtlun chu smart city siam tura tih ngei ngei tul leh pawimawh a ni,” a ti.
MTA President R. Lalawmpuia kaihhruai an inkhawmnaah hian MPCC President hi Elizabeth Malsawmtluangi, Social Media Department MPCC leh MPCC Transport Department hotuten an tawiawm a ni.