Aizawl: Mizoram Pradesh Youth Congress Committee (MPYCC)-in nimin khan parliament session neih meka no confidence motion (no trust motion) put luh mek thlawp tura chief minister hnenah ngenna lehkha pek an tum a, police-ten Chief Minister Office gate-a luh an phal loh avangin hun eng emaw chen an innawr buai.
Chief Minister Office gate bulah hian MPYCC President Laltawnliana chuan thu sawiin, “Tunah hian parliament session-ah no confidence motion chu move mek a ni. Chuvang chuan kan MNF unauten hun an neih lai hian kan MP zahawm takin BJP lamah vote lo turin leh BJP rin lohna motion thlawp ngei turin kan ngen a ni,” a ti.
MPYCC president chuan an Hindu-pui ngeite pawhin Kristiante an nghaisak nasat thu an sawi tawh laia Kristian MP-ten Kristiante nuai chimih vek duhtu BJP party-te an la kawp reng hi an ngaihthiam theih loh thu a sawi.
Chief Minister Office-ah hian buaina siam tum an nih loh thu sawiin Laltawnliana chuan, “Chief minister hi lehkha pe tur mai kan ni a. CM hian official-in BJP sorkar a thlawp dawn lo tih thuchhuah min tihchhuahsak turin kan phut a, tawngka ringawt chu kan awih tawh lo. Facebook-a I&PR Minister Pu Lalruatkima’n BJP an thlawp loh tur thu a post mai mai ang hi chu kan pawm tawh lo va. CAB chungchangah kan hre tawh, a do zawngin ka vote ang titu kan MP zahawm tak khan, Mizo mipuite min nuihzat chungin CAB thlawp zawngin a vote leh si a, Mizo mipuite min tizak lutuk,” tia sawiin, Mizo mipuite a phatsanna ang hi thleng tawh lo se an duh tih a sawi.
MPYCC hi magistrate leh police duty-ten Chief Minister Office gate chhunga luh an phal loh avangin hun eng emaw chen police nen an innawr a, hemi hnu hian magistrate duty-te ruahmanna angin Chief Minister Office gate pawnah, MPYCC duh dan angin lehkha hi Chief Minister Private Secretary Lalhmansanga hnena an theh luh hnuah, Congress thalaite hi an tin darh a ni.