Aizawl: Mizoram SSA Teachers’ Association (MSSTA) chuan anmahni dah nghehna tura court thuthlukna chu khing let lo turin Mizoram sorkar an ngen a, an tan scheme siamsaka a tahtawla dah nghet turin an phut.
Hemi chungchanga thuchhuah an siamah MSSTA chuan SSA zirtirtute chu dinhmun tha zawka an awm beiseiin Gauhati High Court-a an zualko a, court chuan thuthlukna siamin MSSTA member-te chu thla ruk chhunga post creation emaw/regular vacant post emaw/regularisation scheme emaw siamsak turin Mizoram sorkar a hriattir tih an sawi.
Court thuthlukna chu khing let lo tur leh SSA zirtirtute tana tha tur hawi zawnga hma laksak tura sorkar hotute an ngen fo tawh hnuah high court thuthlukna chu court sang zawka khing let tura ruahmanna awm ta mai chu na an tih thu an sawi a ni.
MSSTA thuchhuah chuan Mizoram sorkar sum dinhmun enin SSA zirtirtute chu vawi khatah an nghet vek thei lo a nih pawhin high court thuthlukna chu khing let kher loa scheme siamsaka a tahtawla dah ngheh an phut tlat tih an sawi a, Mizoram sorkar chu court thuthlukna khing let tura thuthlukna a lo siam tawh chu sutsak leh turin an ngen tih an tar lang a ni.