Gauhati High Court Judge Michael Zothankhuma chuan ram hmasawnna hna thawk tur thalai tam tak, home hrang hrangah leh jail-ah te khung bova an awm chu pawi a tih thu sawiin, theih tawpa ruihhlo do turin mipui a sawm.
Nimina Mizoram State Legal Services Authority-in Government Aizawl College Conference Hall-a ND&PS chungchang zir hona an buatsaihah khuallian niin Michael Zothankhuma chuan Mizoramah ruihhlo a hluar thu te, thuneituten ruihhlo an man dante tar langin, kum 2018 atanga July, 2023 thlengin heroin kg 5,199.881 leh ruihtheihthil chi dang tam tham tak man a nih thu sawiin, ruihhlo kaihhnawiha man mi 5,808 zingah, 4,269 chu thubuai siamsak an nih thu te, ruihtheihthil chi hrang hrang man hlut zawng chu Rs. 5,05,50,29,272 man hu a nih thu a sawi.
Resource person Dr. Chawnglungmuana chuan ruihhlo ti tawhte chhanchhuahna kawnga hma lak dan tur leh a enkawl zel dan tur te, ruihtheihthil tih that lohzia te a sawi a. Dr. Lalsangzuala Khiangte, Vice Principal, Govt. Aizawl College chuan inlawmna thu sawiin R. Vanlalena, Member Secretary, Mizoram State Legal Services Authority chuan lawmthu a sawi a ni.