• Huna Kawlvawm

August 8, 2023 khan MCS Combined exam chu an zo fel ta a. Mains exam hlawhtling interview hma chhawn (interview pe ni loin) zingah Civil Service exam kal phung pangngai angin Optional Subject-a mark hmu tam apiang a ti tha an rawn ni leh ang. Tun hnai kum eng emaw zat chhung atang tawhin MCS exam-ah hian exam hma chhawntu (exam petu ni loin) atangin thil sawi neuh neuh a awm deuh ta fo mai. Chunga an thil sawi thenkhatte chu tun hnu zela thu neitu leh exam buatsaihtu MPSC lamin an lo zir chian a, an lo inen fiah theihna tur hetiang hian in sawi zui hlek teh ang.

ZAWHNA CHUNGCHANG

MCS Combined exam-a zawhna siam chungchangah hian tuna an kal phung aia tha zawk tur hian, a bik takin zawhna siam dan leh Optional Subject zawhna awl bik leh Subject thenkhat mark hmuh tam awl bik riauna Subject awm ngei leh mark hmuh tam harsatna em em subject awm nia exam hma chhawn thinte hriat dan hi MPSC hian lo thlir uluk bik se, chung subject-te awlsam anga lang leh harsa bik anga lang te chu an tan en fiah a harsa tur niin a lang lo a, heng thilah hian en fiah leh chiang zawka thlir tur an nei niin a lang.

Optional subject-ah hian zawhna siamtu hi College /University zirtirtu an nih hmel. Zawhna siamtu thenkhatte hian an subject promote tumin zawhna awl deuh zawhna siam ching an awm thin niin a lang. Chung subject te chu college lamah pawh an buk tial tial tura ngaih a ni. Chutianga zawhna siam subject-ah chuan mark sang deuh an hmu thin a, chu subject latute chu an tling tam bik tlurh thin. Tunhma deuhah khan Mizo, Home Science, Sociology, Anthropology, Political Science & International Relations etc subject Optional Subject la-te atanga tlin tlurh a awm thin. Optional-a 90% mark hmu te pawh an awm thei hial thin nia hriat a ni. Nikumah khan Optional subject Paper I & II ah 91%,90% mark hmu phak an awm hial a ni.

Hetiang zat em em mark hmuh hi mak tih loh rual a ni lo a, he subject latute thiam bik vang nge ni ang zawhna siamtu lam zawk ni ta ang le. UPSC in CSE (Civil Service Examination) a buatsaih thinah hian Optional Subject-ah a ti tha ber meuh pawh hian mark 70% hmu tling an awm ngai meuh lo. May 23, 2023 a UPSC in CSE final result a puan tuma pakhatna (IAS topper) Ishita Kishore khan Optional Subject atan Political Science & International Relations subject a la a, Optional Sublect hi Paper I & II a awm a, full mark 250 ve ve a ni a. Ishita Kishore hian Optional Paper I full mark 250 atangin 175 (70 %) a hmu a, Optional Paper II full mark 250 atangin mark 152 (60.8%) a hmu bawk. Optional paper (Political Science & International Studies) full mark 250+250 = 500 atangin Paper I = 175, Paper II =152 Total = 327 (65.4%) a hmu a nih chu.

Kumin 2023 MCS Combined Exam Optional Subject thenkhat zawhna pawh hi zawhna siamtu hian a standard aia hniam zawk (below par standard) zawhna siam a awm em tih hi zawhna awm thei tak a ni. Hetianga zawhna siamtu College/University zirtirtu thenkhat hian chutianga an subject promote an tum em ni ang tih leh an rin tlak leh rinawm an nihna (integrity) te hi a tla hniam em ni ang, chutiang tih ching chu tun hma lam atang tawha awm ngei an awm thin nia ngaihna a awm lian hle a. Subject thenkhata tling an tam chuan College, University-ah kha subject kha zir an tam phah thin a ni.

Kumin exam-ah pawh hian Sociology optional-a latute chuan mark an hmuh that viau a rinawm. Sociology Subject atanga zawhna kha Optional subject-a hmang/la-te ngei pawhin zir hah man a awm lo lutuk, hah leh rim taka zir leh zir nasa lo pawhin kan thiam vek tura siam a ni a, a zia lo deuh an ti. Sociology la lo tan pawh, General studies inbuatsaih atang khan Sociology optional kha a chhan theih deuh vek zu ti a.

ZAWHNA HAR THIN SUBJECT A AWM

Subject thenkhatah thung chuan, zawhna a har lutuk bakah mark an ren lutuk thin avangin mark hmuh that a harsa em em thung lawi nia sawi a awm a. English, Education, Economics, Psychology etc te hi chutianga sawi chu a ni. Master degree nei ngei (MA, MCom, MBA, MSc etc) pawh mahni master-na subject ngei pawh MCS exam-ah optional-a la ngam loa, exam hmasa lama Optional Subject-a mark hmu tha tamna subject lam an en a, chu lam chu an thlan thin avangin mahni Master degree neihna Optional Subject atan thlang an tlem phah thin nia sawi a awm bawk.

ZAWHNA CHHUAK NAWN

Kumin exam-ah hian nikum lama zawhna chhuak tawh chhuak nawn te pawh a awm nia hriat a ni. UPSC in CSE exam a buatsaihah hi chuan zawhna kum zawna chhuak hi a awm ngai lem lo thung nia hriat a ni.

UPSC LEH MPSC

Union Public Service Commission (UPSC) in CSE (Civil Services Examination) a buatsaih thin zawhna zawh dan kal phung (Question pattern) leh Mizoram Public Service Commission in MCS Combined examination a buatsaih zawhna zawh dan kal phung hi a inang lo hle ni a hriat a ni. UPSC hian understanding level atanga chhan turin Question a siam thin laiin MPSC hian memory/bye heart system a chhan turin zawhna a siam thin a. UPSC CSE exam tura inbuatsaihna leh MCS Combined Examination inbuatsaihna hi zawhna zawh dan kal phung a inan loh miau avangin a hrang ve vea inbuatsaih a ngai deuh roh tih thu kan hmelhriat pakhat tuna UPSC Mains examination September 15, 2023 a hma chhawn tur chuan a sawi a, hetiang hi a nih avang hian MCS lam chu Prelims atanga a exam loh law law thu a sawi bawk.

EXAM HUN BICHILH

MPSC in MCS Combined exam a buatsaih Prelims leh Mains hun hi a in hnaih a, a bichilh lutuk hrat deuh chu a ni. Kumin 2023 hian Prelims Exam June 03, 2023 ah neih a ni a, June 20 ah result a chhuak a, August 03, 04, 07,08 ah Mains exam buatsaih a ni leh a. Prelims result chhuah leh Mains exam inkar hun hi a bichilh avangin Mains exam hma chhawn tur tan inbuatsaihna a tlem hret chu a ni.

UPSC Prelims exam hi May 28, 2023 khan neih a ni a, June 12, 2023 ah Prelims result a chhuak a, Mains Exam hi September 15, 2023 atanga tan tur a ni. UPSC prelim exam kha May 28-ah neih a ni a, MPSC prelim kha June 3-ah. A inkar hi a bichilh lutuk. Inbuatsaih dan a hrang si a.

MCS Combined Exam leh UPSC CSE hi Question pattern a danglam avangin inbuatsaih kawp theih dan thui tak awm mahse, inbuatsaih kawp vek theih tak tak loh dan a awm thu exam kawp tawhte hian an sawi bawk.

UPSC Question pattern hian MPSC hian zawhna hi siam ta se, Mizo thalai lehkha thiam lo awm zel tur tan pawh hma sawnna a ni ngei ang.

MCS Combined exam-a hlawhtling te leh UPSC CSE exam hlawhtling te hlawh bul tanna hi a inang reng a, hei vang hian MPSC lam hian UPSC CSE standard aia hniam bik lo tur hian zawhna siam dan kal phung leh hmasawn ngai a pianga hma sawn tur hian tan han la thar mawlh teh se.

Source :
mpsc.mizoram.gov.in
upsc.gov.in