Mizoram Lok Sabha member C Lalrosanga chuan tun tum parliament session chu an ur nasat thu a sawi a. No confidence motion an thlawp chhan chu Congress an thlawp vang ni loin, Manipur-a Zohnahthlakte an thlawp vanga tawmpui mai chauh an nih thu a sawi.
Mizoram MP pahnih C Lalrosanga leh K Vanlalvena te chu Inrinni khan MNF party chuan Lengpui-ah an lo hmuak a. Hmuahna inkhawmah thu sawiin C Lalrosanga chuan parliament session neih zawh takah Manipur chungchang sawi chhuak tura an ur nasat ang huin sawitir an nih loh avangin an lungawi loh thu a sawi.
C Lalrosanga chuan Manipur chungchang hi session hmaa NDA thutkhawmah te, all party leader thutkhawmah sorkar laipui chuan sawi an hlau hle a. All party leader thutkhawmah erawh party zawng zawng an tel avangin an inkhap theih loh thu a sawi a. Parliament chhung zawngin Manipur leh Uniform Civil Code (UCC) chungchang sawi chhuak duh viau mah se hun an pek duh loh thu a sawi.
Lok Sabha member chuan No confidence motion-ah thusawi dil mah se an phalsak lo tih sawiin, “Hmarchhak MP-te min duhsak lo a. Manipur MP pahnihte ngei pawh hun pek an ni lo va. Kan tawrhpuina leh Manipur sorkarin a tihduhdahna laka kan Zohnahthlakte thlavang hauh nan MNF hotute leh Mizoram mipuiin min thlawp avangin huaisen takin kan awm a. Kan tih theih chinah hmalak zel pawh kan tum a. Sorkar laipui hotute pawh kan lakah an lung a awi lo,” a ti.
C Lalrosanga chuan no confidence motion an thlawp avangin NDA lama an thawhpuite ngei pawhin an melh hrek hrek a, biaka chhang duh lo leh chibai duh tawh lote pawh an awm tih sawiin, “No confidence motion pu luttu, Gogoi pawh ka thlawp tur thu ka hrilh a. Ka thlawp chhan tur erawh Congress ka tan a, ka thlawp vang ni lovin Manipur-a kan Zohnahthlakte thlavang hauh a tul avangin motion hi thlawp mai chauh ka ni,” a ti bawk.
Rajya Sabha member K.Vanlalvena pawhin thu sawiin, tun tum session-ah enghelh sa tak mai pahnih thum vel a awm thu a sawi a, MP pakhatin Rajya Sabha session-ah UCC bill pharh phalna sawihona a dil a, India sorkar do zawnga thusawi chu thli bengloh zawnga lehkhachaih chaih ang deuh ni mah se, vanneihthlak takin session tan hmaa all party leader meeting-ah UCC chungchang chu Rajya Sabha emaw. Lok Sabha pass turin a luh loh thu a sawi.
Forest Conservation 2020 bill chu chawhnu session-ah pass a nih thu sawiin K Vanlalvena chuan, “Session tan a ni chiah a, eptu lamin Manipur chungchang sawiho an phut a. Chairman-in sawiho a remtih loh avangin an chhuak vek a, chumi hnuah bill hi an pharh a. Eptu MP zawng zawng an chhuak vek si a, kha bill pass tur kha kei pawhin ka duh loh avangin ka chhuak ve ta a ni,” tia sawiin, eptu member zingah he bill dodal tum an awm loh thu leh India pum puiah duh loh tum MP chu amah chauh a nih thu leh Mizoramin a ngaih pawimawh angin state dangin an ngaih pawimawh loh thu a sawi.
Forest Conservation 2020 bill dodal tum hi eptu zingah pawh an awm loh thu sawiin, dodal tum chu Rajya Sabha MP zingah amah chauh a nih thu a sawi a. “Vote lak a ni lo a, sorkar bill a ni. Dodal zawnga lo sawi kha awmzia a nei lo a. Eptuten bill pass tur an duh loh avangin house an chhuahsan fo a, an thlawp vang kan ti ngai lo. An dodal vang kan ti thin zawk,” a ti.
Rajya Sabha member chuan Forest department thuneihna chhuhsak a, ramngaw thiah vak vak tha a tih loh avangin a mi malin forest bill chu a duh loh thu a sawi a. Hetihlai hian forest bill chu an sawi hlauhawm ang em ema hlauhawma a ngaih loh thu sawiin, “Kan state tan a hlauhawm ka ring lo. MNF leh India sorkar inremna article 371 (G) vangin kan ram a nghawng vak thei lo turah ka ngai,” a ti bawk.
Mizoram MP-te pahnih hmuahna inkhawm hi MNF Treasurer K.Vanlalauva’n a kaihruai a ni.