Aizawl North II bialtu MLA Dr Vanlalthlana chuan ZPM chuan ramin hmasawnna hmel thar a hmuh theih nan danglam ngam tura an infuih thinnate chu party dangten beih nan an hman nasa hle tih a sawi.
ZPM party in Inrinni zing khan Aizawl hmun hrang hrangah Street Campaign an nei a. Durtlang Leitan-a street campaign an neihna hmuna thusawitu Dr Vanlalthlana, MLA chuan ZPM din tirh atangin beih an tawk nasa a, an dodai ve zel tih sawiin, “Heti khawpa min bei chunga hma kan sawn ve bek bek zel hi eng dang vang ni lo vin, Pathian hian Zoram kaihruai tur hian min duh ve tawh ni te pawhin a lang a ni. Beidawng kal khawm ni lovin beiseina thar nei kal khawm kan ni a. Ngaihdan hrang hrang nei te pawh kan awm ve bawk thin mah se kan zavaia min phuar khawmtu chu Pathian a ni,” a ti.
ZPM in Street Campaign an neihna hmun dang Vaivakawn Bazar-ah, Aizawl West I biala ZPM candidate tur TBC Lalvenchhunga, PAC member ni bawkin thu a sawi a. Zemabawk bazarah AMC Corporator Christina Roluahpuii Sailo in thu a sawi a, Chhangurkawnah Aizawl West II ZPM candidate tur Lalnghinglova Hmar in thu a sawi bawk.
Heng street campaign neihna hmun hrang hrangah hian ZPM hruaitu, block leh unit hrang hrangten an tawiawm a ni.