Manipur atanga sahimna zawnga Mizorama tlan luta awm mekte chhawmdawlna atana finance department-in Rs. vaibelchhe 5 a ruahman chu tun kar lo awm turah district tin bawrhsapte kaltlanga semchhuah tan hman beisei a ni.
Home department hotuten an sawi danin finance department-in Rs. vaibelchhe 5 a pek chhuah hi administrative approval leh expenditure sanction tihfel a nih hnuah district bawrhsap hrang hrangin Manipur raltlante tana pawisa an lo hman tawh dante an thehlut a. Chumi zulzui leh raltlan tam dan azirin pawisa hi semchhuah tur a ni dawn a ni.
Zirtawpni tlai lam dar 5 thleng khan Manipur atanga sahimna zawnga Mizorama awm mek hi mi 12,880 an tling tawh a. An zinga mi 9,899-te chuan an chhungkhat laina leh thiante an bel a, mi in luaha khawsa an awm bawk a. Mi 2,981-te chu relief camp 38-ah an awm mek a. Mizoram district 11-ah an inzarpharh vek a ni.
Aizawl district-ah raltlan an tam ber a, 4,518 an awm a. Kolasib district-in dawtin mi 4,443 an awm a, Saitual district-ah mi 2,951 an awm mek bawk.
Hnahthial district-ah an tlem ber a, mi pariat an awm a ni.
Tun hnaiah Imphal phai depah inkahna a awm leh avangin Ningani zan atanga Zirtawpni inkar khan raltlan 246 an luh belh a ni.
Hetih lai hian tun hnai khan Mizoram health department chuan damdawi leh a kaihhnawih Rs. nuai 5 chuang man hu chu Churachandpur District Hospital-a hman turin a thawn a. Hemi zingah hian kal tha lo enkawlna, dyalysis hmanrua Rs. nuai 2 chuang man a tel bawk a ni.