Hmeichhe tennis lama invawrh sang chak tak American tleirawl Cori “Coco” Gauff chuan an rama champion tum mahse bul a tan fuh lova, chesual teuh hle in first round-ah German qualifier Laura Siegemund a hneh hram.
Kum 19 mi Gauff hi a khingpui hian set hmasa berah ngam zawkin set a hloh hmasa a. Mahse set hnihna atang insiamremin 3-6 6-2 6-4 in a chak.
Seeded number six changtu Gauff hi kumin tournament-ah hian champion tura rinkai zingah a tel a. Tunhnaia hmeichhe tennis thununtu Iga Swiatek el tawk ber tura ringtu an tam. Tournament inbuatsaihna atan Washington leh Cincinnati-ah te a champion bawk avangin a chet that tluan lai a ni.
Nimahsela kum 35 mi, Grand Slam doubles champion tum hnih ni tawh Siegemund lakah beisei angin a inlan lo.
Hetihlai hian seeded number eight Maria Sakkari chu player langsar second round lut zo lo a ni ve thung a. Spanish world number 71 Rebeka Masarova lakah 6-4 6-4 in Sakkari hi a tlawm.
Seeded number one hauhtu Iga Swiatek-i’n chak turin minute 58 bak a mamawh lova, 6-0 6-1 in Rebecca Peterson a hneh.
World number one hlui, Grand Slam title la tawh Caroline Wozniacki chuan kum 2020 January a tennis a chawlhsan hnua lo kir lehin a Grand Slam tournament khelh hmasak berah hnehna a chang nghal a. Russian qualifier Tatiana Prozorova chu 6-3 6-2 in a hneh a. 11th seed Petra Kvitova nen an inkhel leh ang.