Wimbledon final khel Ons Jabeur chuan hnehna changin US Open bul tan mahse second round a luhdan a awlsam lova. First round-ah a inkhel zo lo teuh.
Seeded number five changtu Tunisian mi Jabeur hi Louis Armstrong Stadium-ah 7-5 7-6 (7-4) in Camila Osorio lakah a chak a. Mahse kum 29 mi hi an inkhelh laiin medical staff ten an buaipui a ngai.
Thawk lamah harsatna neiin a blood pressure te endik a ni a. A chak hnuah Jabeur chu insawifiahin, “Tunhnaiah damlohna in min tlakbuak a, hei vang hian ka taksa a la chak tawh lo. Inkhelh pawh a ti harsa.”
“Asthma nei thin ka ni bawk a, chuvangin vawiin inkhel chu ka tan a awlsam lo hle.” tiin a sawi.
Inkhel dangah seeded number two hauhtu Aryna Sakalenka pawhin hnehna a chang awlsam lo. A khingpui Maryna Zanevska lakah double fault tum nga lai a nei a. Set khatnaah harsatna nei mahse 6-3 6-2 in a chak thei hram.
Vawi hnih champion tawh kum 43 mi ni tawh Venus Williams-i’n round khatna a paltlang zo lova, 6-1 6-1 in Greet Minnen a hneh lo. Williams hian record a siam chu pawtseiin singles inelnaah vawi 24 a inlanna a ni.
Seeded number 7 Carline Garcia chu 6-4 6-1 in world number 114 Wang Yafan lakah a tlawm ve bawk.