Mizoram State Mixed Martial Arts Association chuan tun thla ni 24 atanga ni 29 chhunga 3rd Indian Open MMA Championship khel turin Mizoram aiawhin fighter pali leh coach pakhat Bhopal-ah a tir a, gold medal pakhat leh bronze medal pakhat an hlawhchhuak.
Mizoram a combat sport a tawnhriat nei tha tawk tak Zemabawk fighter Nazareth Lalthazuala chuan senior flyweight-ah gold medal a la a, an rihna huangah a che tha thei hle.
Round of 16-ah Donyi Polo, Arunachal Pradesh chu techical knockout a hnehin quarter final-ah Bhavesh Dabgoria, Madhya Pradesh chu unanimous decision-in a hneh leh.
Semi final-ah a team-mate Lalhmangaihzuala nen inhmachhawnin chu unanimous decision in a chak a. Final-ah Assam fighter tha Abhijeet Tripura chu unanimous decision a hnehin a champion.
Republic Veng a cheng Hmangaiha’n quarter-final ah Sandeep Bhage chu triangle choke submission hmangin a hneh a. Semi-final ah Nazareth-a nena an inhmachhawnah an inthlau lova, mahse a tlawm zawk niin bronze medal a la.
Mizo fighter inlan dang Israel Lalrinawma, Hunthar chuan junior flyweight round of 16 paltlangin quarter-final ah erawh split decision in a tlawm.
HMS Dawngzuala, Dawrpui pawhin junior welterweight-ah round of 16-ah chakin quarter-final ah a tlawm ve bawk.
He inelnaah hian coach Jonathan Lalduatliana, Falkland leh fighter Nazareth te hi MISMA Senior Vice President Jeremy L. Pautu hmalakna zarah pawlin a sponsor a, a bak zawng chu chu mahnia sponsor zawnga kal an ni. MISMA in a tih thin angin fighter-te leh coach hi pawisa a pai vek bawk.
India rama MMA Federation lian ber MMA India chuan national championship bakah Open hrang hrang pali vel a huaihawt thin a, chung zinga lian ber chu Indian Open hi a ni.
- World Championship
National championship weight pathum a champion ni thei record siam mek Chite Veng a cheng Zarmawia leh flywieght national champion vawi hnih ni ta Nazareth te hi November thlaa Serbia rama Amateur MMA World Championship khelh tur atan thlan nghal an ni.
International medalist nih chuan professional luh chhohna kawng tha tak a inhawng a, MISMA President T. Lalrinpuia chuan theihtawpa hma lakpui zel an tum thu a sawi.
MISMA in a hnuaia infiammite chu tawnhriat tha a tam thei ang ber an neih theihna turin hma lakpui zel an tum a. Thla thar hian Nagaland Fight Night awm turah tuna fighter zinte hi hlawh neia company sponsor veka an fight leh theih nghal tur thu technical chairman Samuel Lalrozama chuan a sawi bawk.