Manchester City striker Erling Haaland chuan English football-ah a season hmasa ber a hman that viau avangin chawimawina a dawn belh a. A player puiten player of the year-ah an thlang.
Thawhlehni zanah United Kingdam a football intelkhawm pawl lian Professional Footballers’ Association chuan Player of the Year chawimawina hun an hmang a. Hetah hian kum 23 mi Norway forward hi Men’s Player of the Year a thlan a ni.
Haaland hian tun season liamta khan Manchester City tan inelna hrang hrangah goal 52 a khung a. Pep Guardiola pawlte hian trophy lian pathum an lak theihna chhan lian tak a ni.
Manchester City tana a khelhpui pahnih Kevin de Bruyne leh John Stones te chu he chawimawina dawng thei chhawpchhuah zingah an tel a. Arsenal player pahnih Bukayo Saka leh Martin Odegaard te bakah Tottenham captain hlui Harry Kane te khumin chawimawina hi a dawng.
“He chawimawina ropui tak ka dawng hi ka tan chuan thil namai lo tak a ni. Ka elpuite ngeiin hetia min chawimawi hi thil lawmawm tak a ni a. Min vote tute zawng zawng chungah lawmthu ka sawi.” tiin Haaland chuan a sawi a.
“Season ropui leh hriatreng tawh tur kan hmang a, keima mimal tan tak pawh hian a ni. Treble champion nih hi ka suangtuah chhin a ni ngai lova, mahse he team, he squad a player danglam bikte nena hetiang hlawhtlinna kan nei hi a hlimawm tak zet.” a ti
Nikum June a Pound maktaduai 51.2 a Borussia Dortmund atanga Manchester City zawmtu Haaland hi Men’s Young Player of the Year chawimawina dawng thei zingah a tel a. Mahse Arsenal tana goal 14 khung a assist vawi 11 neitu England winger Saka chu thlan a ni.
Player naupang chawimawina dawng tur hian Moises Caicedo, Jacob Ramsey, Gabriel Martinelli leh Evan Ferguson te a khum.
Hmeichhe lamah Women’s Super League a goal 22 khungtu Aston Villa striker Rachel Daly chu Player of the Year a thlan a ni a. England player chhawr theihna ngah tak hi WSL top scorer a ni.
Chelsea leh England star, tun World Cup a langsar Lauren James chu Young Player of the Year a ni ve thung.
PFA Player of the Year Awards 2023
PFA Players’ Player of the Year (Male) : Erling Haaland
PFA Players’ Young Player of the Year (Male) : Bukayo Saka
PFA Players’ Player of the Year (Female) : Rachel Daly
PFA Players’ Young Player of the Year (Female) : Laura James
PFA Merit Award : Ian Wright PFA
PFA Team of the Year : Aaron Ramsdale, John Stones, Ruben Dias, William Saliba, Kieran Trippier, Kevin de Bruyne, Rodri,
Martin Odegaard, Bukayo Saka, Harry Kane, Erling Haaland.
PFA WSL Team of the Year : Mary Earps, Ona Batlle, Maya Le Tissier, Alex Greenwood, Rafaelle Souza, Guro Reiten, Frida Maanum,
Yui Hasegawa, Khadija ‘Bunny’ Shaw, Rachel Daly, Sam Kerr