India chuan Pakistan nena inkalpawhna tur, Kartarpur corridor an tih siam tur chungchangah thenawm ram hi July 11 tanga 14 chhung hian tha thara biak tumin ruahmanna a siam.
External Affairs Ministry chuan India-in inbiak hun tur a rawt thar leh tih sawiin hei hi India-in he corridor hi siam ngei a duhzia a tihlanna a nih thu a sawi bawk.
A hmain India hian he corridor siamna tura project awmah Islamabad lamin Khalistani inlak hran dun pawl chu committee-a a telh avangin a lo pawmpui duh lo tawh a. Islamabad hnenah hian he project hi inrem taka thawh a duh thu a lo thlen tawh a ni.
“November, 2018 khan Pakistan hian ramri kâna Sikh sakhaw dintu, Guru Nanak-a thlan awmna, Kartarpur-a Gurdwara Darbar Sahib leh Punjab-a Gurdaspur district-a mi, Dera Baba Nanak inkalpawh theihna tur siam hi a lo remti twh a. Technical-level lamah tum thum India leh Pakistan hi he project atan hian an lo indawr tawh,” tiin External Affairs Ministry thuchhuah chuan a tar lang.
Nikum khan Vice President Venkaiah Naidu leh Punjab Chief Minister Amarinder Singh chuan Kartarpur corridor siamna tur lung hi Gurdaspur district-ah an lo phum tawh a. A hnuah Pakistani Prime Minister Imran Khan pawhin an ram lama corridor sak bul tanna tur chu Narowal-ah a lo phum ve bawk a, hei hi Lahore atanga km 125 vela hla a ni.
Kartarpur corridor hi siam zawh a nih hunah chuan Sikh sakhaw zuituten an sakhaw hmun thianghlim an tlawh theihna tura kawng awlsam a ni dawn a. Kum tin vawi khat tal an hmun thianghlim hi tlawh an duh thin a ni.