Aizawl: Mizoram Journalists’ Association, Lunglei member te, PWD Road Division thawktute leh contractor ten nimin khan World Bank Road hnuaia PWD Division, Lungleiin Thenzawl kaltlanga Aizawl leh Lunglei inkar kawng an chan chin dinhmun an en fiah.
Kum 2010 khan Aizawl leh Lunglei inkar kawng hi World Bank-in a siam zawh hnuah 2019 atanga 2022 thleng khan Lunglei PWD Division chan chin, Lunglei atanga km 64 chu Bhavya Construction Company-in thawmthat hna an thawk.
Hetih lai hian PWD Road Division Lunglei chuan company-ten kawng thawm that hna an thawh duh tak loah chuan security deposit, Rs nuai 193 hmangin an division huam chhung ATL Road repair hna chu an thawk tih an sawi ve thung a. Hetianga Bhavya company security deposit sum an lo hmansak avang hian company hi court-ah an zualko dawn leh dawn loh erawh an hriat loh thu zawhna an chhang thung.
Lunglei MJA-ten kawng an enah hian lirthei chi tin tana kawng chhia avanga zawh hrehawm lutuk a awm loh laiin, khuar neuh neuh hmun tam takah a awm thung.