Deputy Chief Minister Tawnluia’n nimin khan ‘Agriculture Study Tour leh a Kaihhnawih’ tih lehkhabu, H Rammawi ziah chu Soil & Water Conservation Department Conference Hall, Aizawl-ah a tlangzarh.
Lehkhabu tlangzarhtu, Tawnluia chuan lehkhabu rotling, mipuite ei leh bara an intodelh theih nan a lehkhabu tlangzarh tak chu an hman ngei a rin thu a sawi a. Sorkar policy SEDP thil tum ber pawh ram leilung hausakna hmanga horticulture, ran vulhna lam te bakah thlai leh thei hmanga intodelh a nih angin lehkhabu-a a kawng kawhhmuhtu atana tangkai tak tur a nih thu a sawi.
Lehkhabu ziaktu H. Rammawi chuan a lehkhabu ziah chhan pakhat chu, Mizoramah rubber chin dan leh oil palm chin chungchangah titi lengvak a tam em avanga buatsaih a nih thu a sawi a. He a lehkhabuah hian kum 1984-a India ram delegate 34-ten khawvel hmun hrang hrang 12 (USSR, France, Netherlands, UK, USA, Japan, South Korea, Taiwan, Hongkong, Thailand, Malaysia leh Singapore) agriculture hmasawnna lam an kalpui dan zirchiang tura an zin chanchin a nih thu a sawi.
Commissioner Lalkiamlova kaihhruai tlangzarh inkhawmah hian Dy. Speaker H. Biakzaua, Er. Lalrinawma, Cabinet Minister, T.J Lalnuntluanga, Minister of State bakah Rajya Sabha MP K.Vanlalvena, Ramthanmawia, MLA leh sawm bikte an tel a. C. Ngunlianchunga, MLA leh Dr. C Lalsangzuala, Chairman, Mizoram State Commission for Protection of Child Rights te’n thu an sawi bawk.