Ukrainian tennis star Elina Svitolina chuan third round lut turin ‘comeback’ a mamawh a, Anastasia Pavlyuchenkova chu chhangletin set hnuhnung pahnih la in a chak.
Ningani zana inkhelah Svitolina hian 5-7 6-4 6-4 in a khingpui hi a hneh a. Seeded number three Jessica Pegula nen an inhmachhawn leh ang.
Russian mi Pavlyuchenkova hian bul tan tha viau in Svitolina nawrna ang hi a chhanglet thei zel a. A service break sakin set hmasa ber a la.
Set hnihnaah Svitolina hian a insiamthat theihna tura amah cho phur turin a pasal tennis player ve tho Gael Monfils-a result chu chair umpire a zawt.
Set hnihnaah hian insiamtha zuiin an la inkhel tawk viau a, set thumnaah game li a lak zawn hnuah Pavlyuchenkova hian game thum la zawn ve in a tawp thleng an innawr viau hnuah Svitolina a chak ta zawk.
Inkhel zawhah Svitolina chuan, “Inkhel hautak tak mai a ni. Ka kheltha em em lova, ka khelhthat leh tihsual kha a inpawlh hle.” tiin a sawi a.
“Tha thar ka neih theihnan keimah min cho phur thei tur, ka rilru ti thar thei tur ka mamawh a, ka rilruah a awm lai a ni bawk a, kha vang khan a result ka zawt. Ka khelhthat lai tak a nih loh avang hian boruak thlak danglam nan min cho phur thei tur kha ka zawng a ni.” tiin a sawi.
A khingpui tur kum 29 mi Pegula hian an tualchhung court-ah a chetthat a chhunzawm a, 6-3 6-1 in Patricia Maria Tig lakah hnehna a chang.
Pegula hi WTA Tour-ah tunhnaia inelna lian a player che tha tluang thei ber zing ami a ni a. Kum 2021 atang khan third round emaw quarter-finals luh loh tum khat chiah a nei a, a bak erawh a thleng ngai lo.
Inkhel dangah Wimbledon champion Marketa Vondrousova chuan Martina Trevisan 6-2 6-2 in a hneh a. Seeded number 9 ni lai Vondrusova hi Grand Slam inkhelah a zawna vawi 9 a chakna chiah a ni.