Aizawl : MNF Adviser Zothantluanga, MLA chuan Pathianin Zoram tana tha ber turin hun khirh takah MNF a sorkar tir niin a sawi.
Zirtawpnia Hnam Run chhung inkhawmah thu sawiin Aizawl West I bialtu MLA Zothantluanga chuan, Pathianin hun khirh takah MNG a sorkar tir tih sawiin, “Sorkar tha nei turin Pathian hnenah kan tawngtai a, Pu Zoramthanga sorkar a lo piang. Hun khirh tak, Covid leh ramri buai, thenawm buai te hi mihringin kan hrelawk lo a, Pathianin a hrelawk a, MNF min sorkar tir a ni,” a ti.
Zothantluanga chuan, MNF sorkar hnuaiah buhfai leh gas a hnianghnar a, oil-ah harsatna lian tham an tawk lo a. Sorkar thar MNF kaihhruaiah chuan hmun tinah hun reiloteah kawngpui tha a nei ngei dawn tih a sawi a. Zirna lamah pawh nasa takin hma a sawn niin a sawi a. Ramriah sorkar a hnungtawlh lo mai niloin, hma a sawn zel a, ramria hmasawnna phei chu thenawm state te hriata sawi pawh a fuh lo hial nia sawiin, “Harsatna kan tawh lai taka MNF kan sorkar hi hnam tan a hlu em em a. Mi pangngai, party politics ngaihven lemlo ten MNF sorkar hi sorkar thaah an pawm vek a ni,” a ti.
Mizo Hnam Run chhung inkhawm hi MNF Adviser Dawngliana’n a kaihruai a ni.