Premier League-ah striker hriam pathumin Inrinni zanah an team tan hattrick an siam a. Hnehna pawimawh an chanpui theuh.
Champion Manchester City in an inkhelh tawhah hnehna la chang vek turin 5-1 in Fulham an hneh a. Haaland-a’n second half-ah hattrick a siam.
Kar hmasa khan Haaland-a’n Thawhlehni zanah PFA Player of the Year chawimawina a dawng a, Ningani zanah UEFA Player of the Year a dawng leh bawk. A tan kar duhawm tak chu second half goal thumin a khar.
Manchester City in Julian Alvarez hmangin minute 31-naah goal an khung a, Haaland-a siamsak atang Argentine forward in goal a khung.
Fulham in Tim Ream hmangin an si phurh an sut nghal. Halftime dawna an goal chhuahin sawi zui a hlawh bawk.
Nathan Ake-a’n a tauh goal laiin Manuel Akanji chu a offside ngei a, goalkeeper hmaah a ding. Mahse video assistant referee Tony Harrington chuan inkhel a nghawng lo nia ngaiin goal-ah pawm a ni.
Fulham manager Marco Silva chuan, “An goal hnihna khan inkhel a nghawng thui hle. Mahse a pumpui a thlirin first half tha tak a ni a, second half-ah erawh kan nih tur ang kan ni lo.” tiin a sawi.
Hei le Ferguson!
Brighton & Hove Albion in season liamta khan Irish rawlthar striker Evan Ferguson chu first team football an khelh tir tan a, a theihna sang a lang nghal.
Tun season-ah an striker rinrawl zing ami ni nghalin Ferguson-a’n a theihna sang a ti lang a, hattrick siamin 3-1 in Newcastle United an hneh.
Minute 27-naah Republic of Ireland striker Ferguson-a’n goalkeeper Nick Pope tihsual atangin goal hma hruai a khung a. Minute 65-naah goal tha bik khung lehin minute 70-naah a goal thumna a khung.
Kum 19 tlin hma a Premier League hattrick siam thei palina chauh a ni a, Chris Bart-Williams, Robbie Fowler leh Michael Owen te hnung a zui.
Premier League-ah goal 10 a khungna a ni bawk.
Son-a team Spurs
Tottenham in coach thar Ange Postecoglou hnuaiah football huaisen leh hmuhnawm an khelh chhunzawm a. Kaithar Burnley lakah goal nga an khung.
Turf Moor-ah Burnley in Lyle Foster hmangin goal khung hmasa zawk mahse Spurs captain Son Heung-min-a’n minute 16-naah a sut a. Spurs in inkhel thunun zuiin Cristian Romero chuan an goal hnihna halftime dawnah a khung.
Second half-ah James Maddison-a’n an goal thumna khungin Son-a’n minute 63-na leh 66-ah te goal a khung belh a. Burnley in Josh Brownhill hmangin huntawp dawnah goal khat an khung ve bawk.
Thawhlehni zana EFL Cup atanga tla nghal Spurs hian an match hmasa pali atangin point 10 an hmu mek.