New Zealand-a police-te chuan tharum thawha nasa taka che, Auckland supermarket-a mi paruk lai vit hliamtu an kap hlum.
Prime Minister Jacinda Ardern chuan he thil thleng hi ‘firfiak chetna’ tia sawiin a titu chu Sri Lankan mi a nih thu leh police pawhin an enthlak lai a nih thu a sawi.
Amah hi tunge a nih puan a ni lo va; mahse, Islamic State (IS) frfiak pawl thlawptu a nih thu Ardern-i chuan a sawi.
Police-te hian Zirtawpnia mi a beih atanga second 60 chhung lekin an that hman.
“Vawiina thil thleng hi a huatthlala a, a dik lo hle bawk,” tiin Ardern-i chuan thuthar lakhawmtute hnenah a sawi a. “A titu hian mi malin a ti a, rinna avang a ni lo,” a ti.
Hliam tuar mi paruk zinga pathum hi an dinhmun a tha lo hle a, pakhat phei chu a hniam hle niin damdawi in thuneitute chuan an sawi.
“Damdawi ina thawkten an nunna chhan tumin an theihtawp an chhuah a ni,” tiin Auckland Mayor Phil Goff chuan a sawi.
“Thil thleng hian min barakhaihin pawi kan ti hle a; mahse, dikna chu rang takin hlen chhuah a ni,” a ti.
Mi sual chetna hi an ram sanaa Zirtawpni chawhnua Countdown supermarket, LynnMall-a New Lynn district-a thleng a ni.
A titu hian dawra zawrh lai chem lian tak chu lain a bul hnaia mite hi a bei nghal a, a bul lawkah police surveillance team an awm bawk.
Thil thleng hmutu pakhat chuan Stuff NZ hnenah a bul vela mite chu an chiai nasa hle tih a sawi a, online-a video thehdarhah chuan mi tlanchhia leh silai puak ri pawh hriat tur a awm.
“Mi an tlanchhuak a, an chiai a, an te chelchul a ni,” a ti a. Putar pakhat, vih hliam avanga chhuata mu reng pawh a hmuh thu a sawi.