Colombian lawng sipaite chuan lawngchawlhna khawpui, Tumaco vaukama lawng pahnih leta chuang, an zat chiah pawh an la hriat theih lote chu an zawng mek.
Inrinnia Pacific-a lawng chesualah hian mi 14 vel an thi a, pasarih phei chu naupang an ni.
Lawngleng chesual pahnih hi Tumaco atanga tual chhung mi phura San José del Guayabo lam pan an ni.
An chetsual chhan pawh hriat theih a la ni lo va, thuneitute chuan ruang an chhar tawhte chu life jacket ha vek an nih thu an sawi.
Lawngah hian mi eng zat chiah nge chuang hriat a la ni lo va, dam chhuakte erawh chuan mi 16 vel an la kim lo niin an hria.
Tuipui atang hian mi 35 chhanchhuah an ni a, an zinga panga chu naupang an ni a. Tawhsual an tawh lai hian tui chu a phûlin a fawn nasa hle niin an sawi hlawm.
Lawng sipaite hian lawngah hian a chuang thei zat tura bituk aia tam an chuang ngei niin an hria.
Chhuitute chuan lawng pakhat zawka chuang an tam lutuk chu a pil dawn ang a, lawng pahnihnaa mi thenkhat an pakai chu rit lutuk phah velehin an pahnih hian an chetsual phah ta niah an ngai.
Lawng sipaite hian hetiang lawngleng hi lawngleng satliah mai a ni a, lawngchawlhna thuneitute hnenah pawh inziak lut thlap an ni hlawm lo niin an sawi.
Tuipui kam hnaihah hian lui chi hrang hrang luang lut leh chhuak a tam hle a, bungrua leh mihring tei vel nan pawh hetiang lawngleng hi an hmang nasa hle a ni.