Aizawl: MPCC President Lalsawta chuan Mizoram hian rorelna tha leh roreltu tha a mamawh tih a sawi.
Inrinnia AMC Corporator Zodingpuii’n Mizoram Gorkha Youth Association, Lawipu te hnenah plastic chair a pek leh Maubawk Vengthar Welfare hnenah Maubawk Vengthar leh New Secretariat inkar lei (bridge) siamna atan pawisa fai a pek hlanna inkhawmah Lalsawta chuan khawvel ram tlawh chakawm lo zingah North Korea an thlan laiin, tlawh chakawm zingah South Korea an thlan tel ngei a rin thu a sawi a. “Ram insi, inthenawm an ni a. Ram tlawh chakawm loh leh ram tlawh chakawm ber te zinga mi an ni. North Korea chuan ram hruaitu an neih that loh an tuar a; South Korea chuan ram hruaitu tha an neih avangin an ram a changkang chak em em a, ram mipuite tan thlamuang taka chenna tlak a ni thung si a ni,” a ti.
Kumin MLA inthlan lo awm tura Congress party manifesto pakhatna ‘Tang Puihna’ chungchang sawiin Lalsawta chuan, “Kuthnathawktu, nasa taka hna thawktu, an mahnia ding chhuak thei lote hi ‘Tang Puihna’ hmangin dinhmun duhawm leh tha zawkah kan dah theih ngei ka beisei,” tiin, kuthnathawktute tana malsawmna nasa zawk thlen tir turin ‘Tang Puihna’ hi hman tangkai an tum thu leh, mi rethei leh khawsak harsa tan Congress party chu nghet taka a ding zel dawn thu a sawi.