Aizawl: Chief Minister Zoramthanga’n Inrinni zingkar khan a bial chhunga Zemabawk Branch YMA bungraw dahna in, library leh ‘YMA Eng’ chanchinbu chhutna atana hman a hawng.
Zemabawk YMA bungraw dahna in sak thar hi Zemabawk Hall hlui an thiah avang leh hall thar sak mek avanga bungraw thenkhat dah lailawkna tur, mipui leh zirlaite mamawh loh theih lohva kalpui ngai, YMA Library leh YMA ENG chanchinbu chhutna atan hman mek a ni a. MLA fund Rs 2,00,000 senga sak a ni.
Building hi veng chhung mipui leh zirlaite mamawh dahna hmun pawimawh tak a nih avangin bialtu MLA Zoramthanga, Chief Minister chuan Zemabawk Branch YMA hnenah a tul leh mamawh atana hman turin silpouline paruk leh chanchinbu chhutna tur computer lei nan Rs 50,000 a pe bawk.
Hawnna inkhawm buatsaihah chief minister Zoramthanga chuan thu sawiin, Zemabawk YMA leh mipuiten an mamawh tak bungraw dahna in an nei thar leh, library atan leh YMA chanchinbu chhutna hmun atana hman tur an nei chu a lawmpui thu a sawi a. Zemabawk YMA ten thenawm ram buai avanga Zo hnahthlak unau raltlante lo buaipui a, ei tur thlenga an pek thin avangin lawmthu a hrilhin, “Kan ramin hun harsa takte tawk thin mah ila, sorkar chuan hmasawnna hnathawk turin tha a thlah phah lo va, harsatna kan tawhte hi hun tha zawk atana min chher hriamtu atan leh chona atan kan hmang tur a ni,” a ti.
Bialtu MLA hian a bial mipuite chu bial hmasawnna tura mamawh an neihte a hnena thlen zel turin a chah a, a theih ang angin a tahtawla tihhlawhtlin zel tum thu a hrilh bawk.
Zemabawk Branch YMA pawhin building an neih theih nana MLA fund leh thil pek dang petu, an bialtu MLA chungah lawmthu an sawi.