Novak Djokovic chuan a Grand Slam semi-final vawi 47-na tur a lut a. US Open-ah Taylor Fritz lakah hnehna a chang.

Thawhlehni zanah Djokovic hian Arthur Ashe Stadium-ah 6-1 6-4 6-4 in hnehna hi a chang a. Mipa tennis a record ni turin semi-final khel hnem ber a ni ang.

Flushing Meadows a khawlum leh uap tak karah Djokovic hian hnehna hi a chang a, kum 36 mi hi khawlum avangin inkhel tan tir lamah harsatna a nei niin lang mahse an result-ah erawh a lang lo.

Djokovic hian US Open quarter-final a khelh tawhah a tlawm a la nei lova, a zawnin vawi 13 khel tawhin a la chak vek. Roger Federer-a’n mipa Grand Slam semi-final khel hnem ber record a siam chu a pel a ni.

“He infiamna hian thil tam tak min tihsak tawh a, ka nunah thil tam tak a thlen tir. Serbia ram buai, indona in nasa taka a nghawng ram a piang leh seilian ka ni a, harsatna hrang hrang ka tawk hnem hle.”

“Keimah min duhsaktu, tawnhriat nei tha zawkte leh mi kaihruai duhtute ka hmu hi ka vannei a, anni leh ka chhungte tel lovin tun hi ka thleng lovang.” tiin Djokovic chuan a record thar siam chuangchang hi a sawi.

A hma a ding tur Ben Shelton

Djokovic-a hmaah hian a vawikhatna atana Grand Slam semi-final khel tur Ben Shelton a ding dawn a. Ani hian Thawhlehni zanah a hnampui Frances Tiafoe a hneh.

Kum 20 mi American player hi kum 31 chhunga US Open semi-final lut thei naupang ber a ni a. Inkhel hmuhnawm takah Tiafoe hi 6-2 3-6 7-6 (9-7) 6-2 in a hneh a. A khingpui nen hian an service an in break sak chhawk fo.

Kum 1992 a Michael Chang-a’n semi-final a luh hnua lut leh thei naupang ber a ni a, New York-ah hian kum 20 hnua American mi singles inelna a champion leh thei hmasa ber nih a tum mek a. Andy Roddick hnung zui a tum dawn a ni.

“Chak turin ka theihtawp ka chhuah a, a chang hi chuan thildang ngaihtuah lovan theihtawp a beih ringawt hi a ngai thin a, tun tumah ka hlawhtling ta zawk a ni.” tiin a sawi.