A club lamin a chhuah loh tur thu sawi nawn fo mahse a chungchang a reh hleithei lo. Liverpool forward Mohamed Salah chu Al-Ittihad in khawvela player manto ber ni turin lei an dil a, a club lamin an pawm dawn lo niin a lang.
Kum 31 mi hi Saudi club hian an umzui ngawrh em avangin a hma hun hian sawi a hlawh hle a. Hei vang hian Liverpool head coach Jurgen Klopp pawhin chhuahtir an duh loh thu a lo sawi nawn tawh.
Liverpool hian chhuah phal lo mahse sum tam tham taka dawrna erawh an tan hnar a harsa dawn nia sawi a ni a. Al-Ittihad hian Pound maktaduai 215 in lei an dil niin tunhnaiah sawi a ni a. Hei hi Anfield club hian an pawm dawn lo niin a lang a, hei vang hian a chhuah a rinawm lo.
Saudi lamah hian transfer window hi tukin zing dar 2:30 thleng khan hawn a ni a. Hemi hma hian Saudi lam hian Liverpool hi an hmin thei dawn em tih erawh hriat a la ni lo.