Aizawl : BJP Mizoram chuan nimin khan thuchhuah siamin, Congress party-in mipui thluak suk tumin thudik tawk lo hmangin BJP an bei thin nia sawiin, Mizoram mipuite chu fimkhur tur leh thudik hriat tum turin an ngen.
An thuchhuahah BJP Mizoram chuan, Nilainia MPCC thupuangtu Dr Lallianchhunga’n thu thar thehdarh tute a kawmnaah a thusawite chu mipui thluak suk tumna kal zel niin a sawi a. Congress party-in inthlan dawn hnaih apianga dawt hmanga BJP beih runpui an nei thin leh ram hmangaih anga an inlan hun a thlen mek avangin mipuite chu fimkhur tur leh thudik hriat tum zel turin an ngen tih an sawi.
Congress party in kum 60 chuang India ram an enkawl chhungin India ram mipuite an sawisak dan hrang hrang ngaihtuahin Mizoramah bik phei hi chuan Congress party hi awm tawh lo hial zawk awmah an ngaih thu an tar lang a. Congress party hian India ramah lalna leh thuneihna an chan theih nan pawisak an nei ngai lo niin an tar lang.
Dr Lallianchhunga’n BJP central sorkarin dan siam that a tum a tih ho chu ngaihtuah tur pawha an chhawp chhuah loh te a nih thu te, chu mai bakah saptawnga hming then khat mahni ram hminga an thlak tur te anih vangin lo insawithaih chiamna chiah an ngai loh thu an sawi a. BJP Mizoram chuan sakhua leh hnam a him zel theih nan awmze neiin hma an la zel a, an la zel dawn bawk niin an thuchhuahah an tar lang bawk.