Aizawl: ZPM Working President K Sapdanga’n ZPM hian a lu ber atanga a hnuai ber thleng hian inkaihhruaina tha tak an nei tih a sawi.
Nimina ZPM Zonu General Headquarters buatsaiha Vogue Resort, Sakawrtuichhuna Project 50 an kalpui tur tlangzarh inkhawm hmanpuitu ZPM working president chuan pawlin a mamawh ber chu inkaihhruaina tha a nih thu a sawi a. Pawl chhungah harsatna a thlen emaw, ngaihdanah inang lo thil a awm emaw a nih chuan dan bu keu vat thin tur a nih thu sawiin, “Inrelbawlnaah chuan dan bu hi a lal ber a, kan zah bawk tur a ni,” a ti.
Pawlin hma a sawn leh sawn lohah pawh president-in mawhphurhna a nei sang tih sawiin K Sapdanga chuan, “Thurawn kan inpe tawn thin tur a ni a, pawl tana kan mamawhte mahnia bawhzui mai lovin hruaitu lu ber te nen tha taka sawi hi a him ber a ni,” a ti bawk.
K Sapdanga chuan Mizoramin inthlan a hmachhawn mai dawn a, ZPM chuan April khan an intifel thawkhat tawh a, candidate-ten tlin ngei tumin theihtawpin an bei mek tih a sawi a. “Mipui hian inthlan hi kan châk tawh hle mai a, kalphung thar sorkar hmel an duh tawh niin a lang a. Mipui nawlpui titi pawh politics chungchang a ni,” tiin, politics hian khawtlang leh kohhran rawngbawlna thlenga a nghawng avang hian ram dinhmun siam tha tur hian hei aia ngaihtuahna hmang thei tur kalphung thar hi a mamawh tih a sawi.