MNF party chuan Serchhip bialtu MLA Lalduhoma, ZPM chief ministerial candidate chu pawl phuah chawp hnenah MLA fund hmang nasaah an puh.
Nimina Aizawl Press Club-a thu thar thehdarhtute an kawmnaah MNF Media & Publicity General Secretary VL Krosshnehzova chuan RTI atanga chhanna an hmuh dan atangin Lalduhoma hian MLA fund a hmang dik lo nasa hle tih a sawi a. MLA fund atang hian 2021 – 2022 (kum hnih) chhung lek hian damlo kan nan Rs 16,42,000 a hmang a. MLA-in a kanna dawngte hi mi 30 an ni a, Rs. 2,00,000 chuanga dam lo kan hi paruk a nei a, a bak chu 5,000 chung lamin a kan hlawm niin a sawi.
Serchhip bialtu MLA hian a MLA fund hman danah hian pawl phuahchawp hming a hmang nasa hle nia sawiin VL Krosshnehzova chuan, “Zobawm Welfare Committee, Tualvungi Veng Society, Tlangveng Welfare Committee, Varak Dil Welfare Society, Zion Street Welfare, Saphak Welfare Thenzawl tih leh Welfare hming eng emaw zat a hmang a. Welfare hminga fund tam tham tak tak a pekte hi pawl tak awm lo, phuahchawp an ni hlawm. A veng leh khua mite pawhin hetiang pawl hi a awm an hre lo,” a ti.
VL Krosshnehzova chuan, “Pu Lalduhoma hian pawl rintlak tam tak an awm lai leh a khaw neitu, hmasawnna hna thawk tura agency dik, village council an awm reng laia pawl phuahchawp a hmang duh hian a rilru a tichiang hle,” tiin, a fund hi Thenzawl bikah phei chuan village council pali awmte hi pakhatmah a pek loh thu leh, heng welfare lem hming hmanga hnathawktute hi kalphung thar tlangaupuitu ZPM mi leh sa vek an ni tih a sawi bawk.
“Party induhsak bikna na takin an kalpui mek a, mipuiten an aiawha an thlan tlin VC-te pawh an rep char vek duh a. Chuti chung chuan ‘mipui sorkar’ an la tlangaupui ngam hi a huaisenthlak hle,” tiin VL Krosshnehzova chuan, mipui bum tuma an nih lohna anga inlantir mek ZPM-te hi hriatchian a hun hle tih a sawi.