Mizoram Rajya Sabha MP K Vanlalvena’n tlang hrang hranga Zofaten inpumkhatna kawng an zawh zel a tul thu a sawi.
Nilaini zan khan Thenzawl Auditorium, Thenzawl Venghlun-ah Mizo Students’ Union (MSU) General Conference vawi 21 neih tan a ni a. Inkhawmpui tan zanah hian K Vanlalvena chu khuallian niin, Serchhip bialtu MLA Lalduhoma chu Uaptu a ni.
Khuallian K Vanlalvena chuan zirlai pawlte chu hman atanga vawiin thlengin hnam inpumkhatna kawnga thawhhlawk ber an nih thin thu a sawi a. “Vawiinia zirlai leh thalaite kutah kan ram ala awm ngei ngei dawn a, kan ram hruaitu an la ni dawn a. Thalaiten an zir chuan kan ram a la tha dawn,” a ti.
Mizo hnam inpumkhatna chungchang sawiin K. Vanlalvena chuan zirlai pawl chu hman atanga vawiin thlengin hnam inpumkhatna kawnga thawhhlawk ber a ni thin a, theihtawp chhuah zel turin zirlaite a chah a. Tun dinhmunah Mizorama journalist – print media leh Cable TV-te chu hnam inpumkhat nana thawktu ropui tak an ni tawh tih sawiin lawmawm a tih thu te, Mizo hnam hrang hrang ten inpumkhatna kawngah hma an sawn a, tun hmaa tawng tlema danglam vanga inpawmlo pawh an inpawm vek tawh niin a sawi.
K Vanlalvena chuan Zo hnahthlak hmun hrang hranga awmte buaina harsatna leh thihnaten Mizo hnam inpumkhatnaah a hnukkhawm mek tih sawiin, “Hmun hrang hrangah Zofaten inpumkhatna kawng kan zawh zel a tul a. Mizo hnam chu Pathian din a ni a, unaua Pathianin a siam ten unau kan ni tih kan pawm mai tur a ni,” a ti.
Khualzahawm, Serchhip bialtu MLA Lalduhoma chuan, tun lai khawvel thang zelah social media te awm mah se, lehkhabu aiin innghah nana hman tlak a la nih loh thu a sawi a. Zirlaiten lehkhabu tha chhiar uar a, ngaihtuahna tha nei turin a chah a. Zirlai zawng zawng zirnaah an hlawhtling vek dawn lo tih sawiin, zirnaa hlawhtling lo leh thleng sang kher lo te pawh beidawng lo va, kawng hrang hrangah hlawhtlinna chan theih a ni hre turin zirlaite a chah bawk.
He hunah hian Special Guest, Myanmar National Unity Government a Representatives to India, Salai Isaac Khen pawhin thu sawiin, Myanmar NUG sorkar aiawhin Mizoram mipui leh sorkar chungah ral tlan an lo puihna zawng zawngah lawmthu a sawi a. Myanmar atanga Mizorama awm zingah mi tha lo an awm thin pawi a tih thu sawiin, India ram dan leh hraite zawm tura an infuih thin thu a sawi.