MPCC President Lalsawta chuan ram chhe mek siam tha leh turin thalai mi thiam tak tak, politics ngaihven lem lote pawhin a chhunga an luhchilh ve a tul tawh tih a sawi.
Mizoram Pradesh Youth Congress Committee (MPYCC) chuan nimin khan Vana Pa Hall-ah State Convention an hmang a. He hunah MPCC president chuan thu sawiin ram rawngbawl turin thalaite chu Lalpan a ko tih sawiin, “Politics hi a sir atanga lo thlir ringawt hian awmzia a nei lo a, thalai mi thiam tak tak politics ngaihven lem lote pawh, kan ram chhe mek siam tha leh tur hian a chhung a an rawn luhchih ve a ngai tawh a ni,” a ti.
“Kan state mai bakah ram pumah BJP sorkarin lal a hrawt mek a. Kan ram, kan hnam leh sakhua nasa taka suasamin a him lo em em tawh a. Ramin a dinhmun tawn mek atanga a tal chhuah leh theihna tur leh ram siam tha leh tura ngaihtuahna nasa tak seng tur hian Lalsawta’n a ko lo che u a, kan Pathianin kan ram siam tha tur hian a ko che u a ni,” a ti bawk.
CLP leader leh Thorang bialtu MLA ni bawk, Zodintluanga Ralte pawhin thu sawiin Mizorama political party hrang hrangten an thalaite ram hruaitu atan an chher chhuak ngai lo a. Congress party chauhin thalaite ram hruaitu atan an chher chhuak thin tih a sawi a. Tun dinhmunah Congress party-in MLA leh minister an neih tawhte zingah hian Congress thalai chhul chhuak hi zaa 40 dawn an nih thu a sawi.
Zodintluanga Ralte chuan mi thenkhatin Congress party chu engmah ram tana tih nei lo angin an sawi thin mah se, tuna Mizoram hmasawnna ruhrel lian a neih zawng zawng zinga zaa za deuh thaw hi Congress kutchhuak a nih thu a sawi a. “Congress party chuan, ‘NLUP kan sem dawn,’ kan ti a, sorkar kal taah khan chhungkaw nuai 1,04,000 chuang NLUP kan pe a. MNF sorkar hian, ‘SEDP Rs nuai 3 kan sem dawn,’ an ti a, vawiina an thlen chin chu kan hmu vek a ni,” a ti.
Sorkar kal tawhte sawiseltute sawiin, “Mizoram sorkar kal tawh sawiseltu, Guwahati lama a zin dan an sawi luih luih thlawh chhuahna Lengpui Airport-te pawh khu kan sorkar kal tawh siam a ni. Ani kha chu enchhintu an tam tawh lutuk a, Zoram mipuiin ZPM hotupa hi a enchhin a tul tawh lo,” Zodintluanga Ralte chuan a ti bawk.
MPYCC Sr. Vice President Ngurdingpuia Pachuau kaihhruai inkhawmah hian MPYCC President Laltawnliana bakah AICC Mizoram Election Observer Sachin Rao leh IYC Secretary Mizoram i/c Sarifa Rahman te pawhin thu an sawi a ni.
MPYCC State Convention-ah hian MPCC President Lalsawta kaihhruaina an rin tawk thu te, sorkar hnathawkte a hun taka hlawh la thei loa an awm chu pawi an tih thu te, Mizorama party hrang zingah ram, hnam leh sakhua a him theih nan Congress party lo chu party dang an awm loh thu te, India ramah BJP kaihhruai sorkar NDA-in Uniform Civil Code (UCC) leh One Nation, One Election kalpui tumin hma a lak mek titawp tura Indian National Congress kaihhruai, party hrang hrang 28 I.N.D.I.A (Indian National Developmental Inclusive Alliance) inzawm khawmte hmalakna an thlawp thute leh MPCC election manifesto |ang Puihna chu din chhuah tum tak taka tang, thalai, kut hnathawkte, tan ngaihna hre tawh lo khawpa dinhmun tleu tawhte leh kawng hrang hranga eizawngtute tan tha an tih tawk thute resolution an siam a ni.