Aizawl: MPCC Vice President Lalnunmawia Chuaungo chuan Mizoramin thil hlauhawm a hmachhawn leh mek nia sawiin, hnam tlem zawk leh sakhaw tlem zawkte che thei lova siam hi BJP thil tum ber a nih thu a sawi.
Zirtawpnia Congress party-in an party pisa-a Friday Political Session an neihah Lalnunmawia Chuaungo chuan BJP sorkarin Manipur-ah hleih nei takin ro an rel a, a tuartute chu Zohnahthlak an unaute an ni a. Central sorkarin a tih tur a ti duh miah lo va. Sakhaw zalenna pawh tihchhiatin a awm mek nia sawiin, “Hnam hnufual zawk leh tlem zawkte dinhmun hi BJP sorkar hnuaiah a him lo a ni,” a ti.
February 19, 2019 khan Assam Rifles-te hi Mizoram police thuneih ang home ministry-in a pe ve thlap tih sawiin Lalnunmawia Chuaungo chuan, “Dan leh thupek hi state sorkar thuneihna a ni chungin Assam Rifles-te eng nge an pek ve ngawt? Kei ngei pawhin an order chhuah tawh chu withdraw turin home ministry lehkha ka ziak a, engah mah an ngai lo. Mizo mipuiten kan huat leh kan duh loh em em hi Assam Rifles-te hian rawn ti ta se tih theih kan nei dawn lo,” a ti bawk.
Lalnunmawia Chuaungo chuan BJP-in India institution ropui tak taka principle leh dean atan anmahni mi leh sa, Hindu kulmuk dah an ching nia sawiin, “Kan sakhua hi nasa taka nekchep an tum a, an nekchep mek zel a ni. Kan missionary-te pawhin tun hma angin rawng an bawl thei tawh lo,” tiin, heng avangte hian nakum Lok Sabha inthlanah Congress leh a thawhpuite an sorkar leh ngei ngei a ngaih thu a sawi.
Central-a BJP chakna titawp turin kumina state panga inthlan hi a pawimawh dawn tih sawiin MPCC vice president chuan, “Chung zingah chuan Mizoram General Election pawh a tel. North East-ah BJP leh a thawhpuiten sorkarna an chang vek. India rama Congress a thawh kân leh theihna tur atan Mizorama Congress an sorkar a ngai a. Congress lo chu kan ram, kan hnam, kan sakhua min humhimsak theitu tur an awm lo. Chumi humhim turin Congress kan sorkar leh a ngai a ni,” a ti.
Congress vice president chuan sorkarah hian a hruaitu chief minister an pawimawh a. Khawvel ram changkangte hian hruaitu tha an neih avangin dinhmun duhawm zawkah an awm phah thin a. Mizoram pawhin hruaitu tha a mamawh a. Congress party chuan chutianga ram kaihruai tha thei tur hruaitu a nei niin a sawi bawk.