Neymar chu Brazilian football chanchin a mipa player goal khung hnem ber a ni a, Bolivia 5-1 a an hneh tumin goal hnih a khung.
Kum 31 mi forward hian Brazilian legend Pele a khum a. Inrinni zinga Estádio Olímpico do Pará a World Cup qualifying inkhel an hmachhawn dawn hian goal 77 khungin Pele nen an intluk chiah.
Ram tana vawi 125 a inkhelh tumah hian penalty a khung lova, mahse second half-ah goal hnih a khung ta tho.
“He record hi ka khum theih ka ring ngai lo. Pele ai hian ka ropui lova, ka tha zawk lo. He team tana khel tawh midangte aia ka that zawkna hi a awm lo.” tiin Neymar chuan record thar a siam hnuah a sawi.
Brazilian football a ram tana goal khung hnem ber chu Marta niin Brazil women’ team legend hian match 189 atangin goal 122 a khung.
Brazil coach Fernando Diniz chuan a player fakin, “A tih tur dik tak zaninah a rawn hlen chhuak. Nuam ti takin a inkhel a, goal hnih a khung a, record thar a siam. Player ropui a ni a, hei hi khawvel mipuiin kan pawm tlang.” tiin a sawi.
Inkhel dangah Uruguay in coach thar Marcelo Bielsa hnuaiah hnehna changin bul an tan a. South American qualifying bul an tannaah 3-1 in Chile an hneh.
Montevideo a Estadio Centenario a inkhelah hian Uruguay in Nicolás de la Cruz goal hnih leh Federico Valverde goal khung hmangin hnehna an chang a, Arturo Vidal chuan mikhual team tan goal khat a khung.