Aizawl: Mizoram Pradesh Congress Committee (MPCC) President Lalsawta’n Serampore College Principal Dr Vansanglura chu Congress party-ah Zirtawpni zan khan a lawm lut.
Hyve Studio, Tuikuala lawm luh inkhawmah Congress president chuan an la tawn ngai loh, tawn zen zen loh, mi duhawm leh huaisen, Dr. Vansanglura chu ram leh hnam tana hnathawk turin, thawk rim turin, tuar tur te, tlakchham ngam tur leh mahni inhlan ral thak ngam turin Congress party-ah an lawm lut tih sawiin, “Congress party a zawm chhan, kan ram, kan hnam leh kan sakhaw tan a ni,” a ti.
Dr Vansanglura chuan pawhin thu sawiin, Congress party a zawm chhan chu Lal Isua chanchin tha la hre lo te hnena nasa zawka hril a nih theihna tura kawng sial a ngaih vang a ni a. Chutiang tur chuan Serampore College a thawkte pawh khawtlang leh ram siamthatna tura politics tel phalsak an ni tih sawiin, “William Carey-a thutthlenga thut leh ram leh hnam siamtha tura ke pen chhuah hi a in mil hle a. Kei pawh a hnung zui turin ka pen chhuak a ni,” a ti.
Congress party zawm thar Dr Vansanglura chuan, “Tunah hian India ram leh Mizoram hian eng kawng nge kan zawh dawn tih zawhna hi kan in zawh a hun takzet tawh. Kan ram, kan hnam, kan sakhua hmalam hun thui tak hriltu tur inthlan kan hmachhawn mek. Ral khata thlir mai mai a hun tawh lo,” a ti a. Sakhaw zalenna palzut a, democracy lungphum pawimawh tak sawinghingtu, zalenna tichhia a, sakhaw hmun tihchhetu leh hmun thianghlim tibawrhbang a, Zo hnahthlak unaute chunga rawva taka che Hindu lal ram tundin tuma BJP chakna chhu chat theitu chu Congress Party a nih thu a sawi.
“Min nghaisatu leh min nekchep a, min chimral tuktu BJP lo thawhpui duhtu leh thawhpui tura thuthlung ziaktu an awm ta hi a pawi takzet,” tia sawiin Dr Vansanglura chuan, BJP thawhpui leh pui loh tur chiang lote chungah innghah ngam a ni lo va, heng mite hnena risk lak loh a him ber thu a sawi a. “Hindu lal ram din tum tute thawhpui ve miah lo tur, BJP kan thawhpui dawn lo tia sawifiah fo ngai lo, Pu Lalsawta kaihhruai Congress kut tihchak hi kan ram, kan hnam leh kan sakhaw tan a tul takzet a ni,” a ti bawk.
Lawmluh inkhawma hunserh hmangtu Rev. Father Joseph Lalbiakthanga, Vicar General, Parish Priest Cathedral Church, Aizawl pawhin, Mizoramin sorkarna chelhtu party hrang hrang a nei tawh a. Duh ang diak diaka hmasawnna mipuite pe kher lo mah se, sorkar kal tawhten hmasawnna hna nasa takin an thawk a. An hnathawh chhawrtu Mizoram mipui an nih thu leh, engmah tih nei lo leh Mizoram hi chhe ta viau leh midang phak lo lutuk anga inchhuah chu a dik lo a. Chuvangin, nasa zawka hmasawnnaah beisei nei tura rilru tihchak a, rilru dik put a ngai a. Mizo sakhua, ram leh hnam humhim hi tuna tih mak mawh a nih thu a sawi.