Fifteenth Finance Commission-a an member ni mek, Shaktikanta Das chu nimin khan Reserve Bank of India (RBI) governor thar atan ruat a ni a, Thawhtannia RBI governor atanga bâng ta, Urjit Patel chu a thlak dawn a ni.
“Appointments Committee of the Cabinet chuan Secretary, Department of Economic Affairs hlui, Shaktikanta Das-a Reserve Bank of India (RBI) Governor atana kum 3 chhung ruatna chu a pawm,” tiin an sawi.
Das hi department of economic affairs-ah secretary a lo ni tawh thin a, governor-ah hian kum thum chhung a tang dawn a, Economic Affairs Secretary atang hian May, 2017 khan a chawl a ni.
Kum 1980 batch IAS officer niin Tamil Nadu cadre a ni a, sorkar hna lian hrang hrang a chelh kual hnem tawh hle a, fak a hlawh viau thin bawk a. Bharatiya Janata Party kaihhruai NDA leh Indian National Congress kaihhruai UPA sorkar hnuaiah hna lian thawk tawhin sorkar lian tak tak a lo hrawn tawh thin a ni.
Das-an a thlak tak Patel hi sorkara inhruipawhna nasa tak awm avanga bâng a ni deuh ber a, nakuma inthlanpui lo awm mai tura BJP kaihhruai sorkar a tang nasa tawh a, hetih lai hian public sector bank-ten ba an ngah bawk si a, rulh theih loh a tam avangin nawrna a nasa a, thil a kal mumal thei lo a ni ber.