Novak Djokovic-a’n record dinglai tluk turin a Grand Slam title 24-na a la a. US Open final-ah Daniil Medvedev hnehin a champion.

New York khawpui a Thawhtanni zinga final inkhelah hian kum 36 mi hian a khingpui hi 6-3 7-6 (7-5) 6-3 in a hneh a. Straight set a chak nimahsela hnehna a chan dan erawh a awlsam lo.

Set khatna la turin harsatna lian a khingpui atangin a tawk lova. Mahse set hnihna erawh a boruak a dang. Tie-breaker khelh ngaiin darkar khat leh minute 44 chhung an khel.

Set thumnaah service an in break sak ve ve hnuah Djokovic-a’n a tawp a khar tha zawk a. Hnehna changin Margaret Court-i’n kum 50 chhung a lo chelh tawh record chu a tluk chiah a ni.

Ngaihthah thiang lo Djokovic

Kumin Wimbledon final-ah Carlos Alcaraz lakah a tlawm a, hei hi tam takin chhuanthar tan hun inhawnna niin an ngai a. Tennis thununtu arsi lian pathumte hun a kiam ta tih nemnghettu ah an ngai.

Hei vang hian kumin US Open-ah pawh Djokovic hi champion tura rin zingah la tel mahse a tan a awlsam dawn lo nia rinna a awm.

Final a luhna kawngah tum danga Grand Slam tournament a round sang lam lut tura a chetthat tluan parh angin che chiah lo mahse a mamawh ang result a nei zel thei a, a hma a chona awm ang chu hneh turin a bei hlawhtling zel.

Final inkhelah pawh hian thil a danglam chuang lo. Bul a tan that avangin set khatna a la mai a, set hnihna erawh a harsa.

Set hnihna rei tak an khelh avangin a taksa pawh a nghawng niin a lang a, nidanga a chet angin a che lo.

Medvedev-a’n hei hi remchangah a la a, Djokovic a tlan tam tir. Nimahsela tawnhriat nei ngah tawh Djokovic hi chiai duh lovin a tawpah erawh set la turin a ding chang ta zawk tho a ni.

A kum tam tawhin tennis lamah a hun a hmawr ve tan tawh mahse Djokovic a la tha chungnung hle a. Grand Slam tournament a khelh hnuhnung 12 atangin vawi 8 a champion thei.

Kumin bikah Grand Slam tournament pali awm atangin pathumah a champion a. World number one thar a ni leh bawk.

Record a beisei ber lo

A chak hnuah Djokovic chuan Grand Slam title 24 lak chu a beisei ber a nih ngai loh thu a sawi a. “Ka tan chuan he record hi thil hlu bik tak a ni.”

“He infiamnaah a sang ber thlen theih hi naupang ka nihlai atanga ka lo suangtuah thin a ni a. He infiamna hian kei leh ka chhungte tan hun harsa tak atangin min khaichhuak a ni.” a ti a.

“Tun dinhmun hi ka thleng thei ang tih hi ka ngaihtuah ngai lo. Mahse tunhnai kum hnih chhung vel atangin ka hmaah a awm tih han hriat a, ka ban phaka a awm takah kha chuan theihtawp chhuah a beih kha ka tum.” tiin a sawi.