Aizawl : Higher & Technical Education Minister Dr. R. Lalth- angliana’n RUSA sum Rs. nuai 150 senga Govt. Aizawl North College building-a floor hnih sak belh chu nimin khan a hawng.
H&TE Minister chuan khawpui pawnlam deuhah a theih anga anga college hmunhma sawnchhuah leh dah chu thil tul tak nia sawiin, hemi kawngah hian sorkar pawhin a theih anga hma lain, a enzui reng tih a sawi a. “Duh angin infrastructure te la nei lo mah ila, college tha tehfung NAAC Accreditation ah sorkar College 23 zinga 19 laiin Grade tha tak an hmu hi a lawmawm a, hetiang tehfung ah hian India rama state zinga sang ber niin, an tehfungah za zelah 83 kan hmu pha a, hei hi thil lawmawm tak niin kan zirna in quality a hril nghe nghe a ni”, a ti.
Zirna leh khawsak phungah tunlai leh hmanlai danglam dan sawiin, H&TE Minister chuan “awlsamna tinreng kan ban phak leh kan hman theih a awm tawh a, hengte hi hman tangkai thiam a ngai a, kan hman thiam loh chuan kan nun tichhetu an ni thei a, a nih dan tur anga taka hengte hi hmang tangkai turin zirlai naupangte hi ka duh cheu ni” tiin zirlai te a fuih bawk.