Portugal in 2024 European Championship Qualifying a an la chak vek chu an chhunzawm a. Luxembourg lakah goal kua khungin hnehna an chang.
Estadio Algarve-ah Portugal hian an mikhualte hi 9-0 in an hneh a. Euro 2024 khel turin thla leh hian an tling thei tawh.
- A goal mawlh mawlh
Hrem avanga khel lo Cristiano Ronaldo tel lovin Portugal an hlauhawm a, goal nawr ah harsatna an nei lo.
Halftime hma in goal li in hma an hruai thei a. Defender beiseiawm tak Goncalo Inacio chuan minute 14-na leh halftime hma chiahin goal a khung a. Striker Goncalo Ramos chuan minute 18-na leh 33-naah goal a khung ve bawk.
Second half-ah Diogo Jota chuan minute 57-na leh 77-naah goal a khung a. A goal hnih inkarah hian Ricardo Horta chuan goal khat khung ve in tun qualifier inkhel pahnih a che tha tak Portugal midfield a pawimawh Bruno Fernandes chuan minute 83-naah goal a khung a. Midang goal khung tur vawi thum a siamsak bawk.
Huntawp hma in Barcelona forward Joao Felix chuan goal khat a khung ve leh hman a ni.
Portugal hian match ruk atang hnehna an chang vek a, Roberto Martinez hnuaiah an che tha hle a, goal 24 khungin goal khat mah an la chhuah lo.
October 13 hian Slovakia lakah hnehna an chan a, pathumna a awm Luxembourg in Iceland an hneh zawh loh chuan Germany pan turin an tling chiang tawh ang.
- Inkhel dang
Thawhtanni zan inkhel dangah Wales in Euro 2024 beiseina la insiamin 2-0 in Latvia an hneh.
Skonto Stadions a inkhelah Wales tan Aaron Ramsey leh David Brooks ten goal an khung.
Croatia in 1-0 in Armenia an hneh ve bawk a. Andrej Kramaric chuan goal awmchhun khungin match li atang vawi thum an chakna niin group D-ah hmahruaitu an ni mek.