Aizawl: Mizoram sorkarin Mizoram Journalists’ Association (MJA) member thite ralna a pek thin, ex-gratia chu nimin khan mi pathum thi chhungte hnenah I&PR Minister Lalruatkima’n a hlan.
I&PR Minister Lalruatkima chuan chanchinbumi sun takte a ui tak zet thu leh an kalsan chhungte a tawrhpui thu a sawi a. Mi mal taka a hriatchiante leh sulhnu pawimawh tam tak hnutchhiahtute an nih thu sawiin, an sulhnu chhinchhiahtlak tak takte chu hriatreng a ni tawh dawn niin a sawi.
Lalruatkima hian sorkarin journalist tan hamthatna eng emaw zah a chhawpchhuah thu a sawi a. Mizoram Journalist Welfare Scheme hnuaiah kum khat atan Rs. nuai 20 a dah thu leh hei hi damloh nikhuaa medical bill atan leh ex gratia atana hman thin a nih thu a sawi a. Journalist Pension Scheme chungchangah a hlawhtlin theih nan theihtawp chhuah mek a nih thu a sawi.
Mipui leh sorkar inkara palai hna thawktu pawimawh tak, I&PR department leh MJA chu inngheng tlat an nih thu Lalruatkima hian a sawi a. Social media kaltlanga thu belhchian dawl lo vawrh darh thinte ven leh thu dik puanchhuah kawnga hmalakho zel a pawimawh thu sawiin, “Mipuite kawng dik kawhhmuha zirtirna dik pek kawnga hmalak hi kan mawhphurhna a ni,” a ti.
MJA member thite ralna hun I&PR Auditorium-a hman hi I&PR Director C.Lalnunkima’n a kaihruai a. He hunah hian accredited journalist pahnih – December 2, 2022-a thi, Alfred Vanchhawng, DDK Aizawl, Executive Member, MJA (Hqrs) Aizawl leh December 27, 2022-a thi, V. Zoramthara, News Reporter, LPS Vision chhungte hnenah ex-gratia Rs 1,50,000 hlan niin journalist dang, May 23, 2023-a thi, E. Lalhleia, Editor, Aizawl Observer chhungte hnenah ex-gratia Rs 1,00,000 hlan a ni bawk.