Madhya Pradesh, Panna district-a inhlawhfa pali chuan kum tam tak an zawn hnuah lunghlu carat 8.22-a lian, Rs. Nuai 40 man vel tur an lai chhuak.
Panna District Collector Sanjay Kumar Mishra chuan Ratanlal Prajapati-a leh a thiante hian Hirapur Tapariyan-a ram an hawh pakhatah lunghlu hi an lai chhuak tih a sawi a. An thil hmuh leh thil hlu dangte chu tun thla tawpah hian an lilam ang.
Thuneitute hian lunghlu hi an lilam hunah a lai chhuaktute hnenah hian sorkar dan anga sorkarin a chan ve tur leh chhiah an laksak hnuah a man an hlan dawn tih an sawi.
Lunghlu lian tha tak bakah hian lunghlu dang tenau deuh 139 lilam tur a awm a, September 21 atangin an tan dawn a ni.
Tual chhunga lunghlu lam thiamte chuan an thil laih chhuah thar hi Rs. Nuai 40 man tal a nih an ring.
A lai chhuaktu zinga mi, Raghuvir Prajapati chuan lunghlu lai chhuak tur hian khur hrang hrangah kum 15 chhung an lo zawn tawh thu a sawi a. “Kum 15 liam ta chhung khan khur tenau deuhte kan haw a, kan hmu thei lo va. Kuminah hian Hirapur Tapariyan-a mi hi thla ruk kal ta atang khan kan hawh leh ta a ni,” a ti.
Raghuvir Prajapati-a chuan an lunghlu hralhna chu nunkhaw nawm ve nam leh an fate zirna atan an hman dawn thu a sawi.
State khawpui, Bhopal atanga km 380 chuanga hla, Panna district hi lunghlu tamna a ni a, mi thiamte chuan carat nuai 12 vel zet awm turah an ngai a ni.