Hurricane Nicholas chuan United States-a Texas vaukam atanga khawmual a kai hnuah a chakna hlohvin tropical storm chauh a ni tawh a; mahse, ruah nasa tak thlenin nunna atana hlauhawm khawp tui lian a thlen hlauhthawn a ni.
Nicholas hi Thawhlehni zing (Thawhtanni zan) dar 12:30 (India rama Thawlheni chawhma dar 11:00) vela khawmual a kai lai hian hurricane a ni a; mahse, a chakna a hloh zui nghal vat a ni.
PowerOutage.us atanga a lan dan chuan Texas-ah hian in 3,60,000 chuangin power supply an nei lo.
President Joe Biden chuan Louisiana-ah emergency a puang.
US nuaitu hurricane na ber pangana, Hurricane Ida-in a nuai hnu lawkah Nicholas hi a thawk a. Ida avang hian Louisiana-ah hian mi eng emaw zat thiin maktaduai telin power an nei lo.
Nicholas hian darkar khata km 110-a chak thlipui a keng tel niin khawchin zirtute chuan an sawi a. Texas vaukam leh Louisiana chuan chung lam nuai tur leh ruah inches nga atanga 10 thleng sur tura sawi lawk a ni.
Louisiana laili leh chhim lam inkarah chuan inches 20 hial pawh a sur thei niin an sawi bawk.
US National Hurricane Centre chuan Nicholas hi ram laili lam hawia kal zelin a chak lo hret hret zel niin a sawi.
National Weather Service chuan chak lo tawh mah se tui lian tak, nunna atana hlauhawm a thlen thei a, a bikin khawpui lianah a thleng thei niin an sawi.
“He thil avanga tumahin nunna an chân loh chu kan duh ber a ni,” tiin Louisiana Governor John Bel Edwards chuan thuthar lakhawmtute a kawmnaah a sawi.